! آه يا دنيا

آه يا دنيا و اشحال قاسية

تشهّينا بمراكب راسية

و ما هي غير حْطام

و مْجادفها و لحبال راشية

¤

مشيت ف طريقك بخطوات هادية

اوطيت و تخطّيت اشواك دامية

و لا بلغت الْمْرام

و ها يانا ما زلت غادية

¤

آه يا دنيا و اشحال قاسية

رمْت لسوارك لقيتها حامية

ما يبرّدها مدام

كيف جْمار قلبي الكَادية

¤

لقيت وحوش ف جنبها ضارية

و نسور ف بروجها العالية

و نفوس على التّمام

امكسّرة و ارواح فانية

¤

آه يا دنيا و اشحال قاسية

¤¤

حفيظة غويلة

ناس..و ناس

منشورات مطبعة السعادة

الطبعة الأولى 2007

ص 97-98