علاش يا مسخوط الوالدين ¤ كبّرتك يمّاك و رميتها ف الخيرية
تبكي و تكَول غادي بيَ فين ¤ أنا يمّاك ربّيتك كي كنت قويّة
يا ولدي لا سمع لا عينين ¤ و مريضة فين غادي بيَّ
الوالدين هما أساس الدين ¤ خاف يا ولدي بالقوّة الربانية
تسع شهور في كرشي جنين ¤ و ولدتك و غسلت وسخك بيديَّ
يا ولدي الفقر و ربّيتك سنين ¤ و رضعت لحليب اللّي فيَّ
كنت توسخني بوسخك الشين ¤ نضحك و نقول ألف هنيّة
ويلا مرضت ما نغمّض العين ¤ نتمنّى مرضك يولّي ليَّ
على صدري قابْضاك باليدّين ¤ نبكي و الدموع تسيل بعينيَّ
و نكَول يا سيدي ربّي لحنين ¤ شافي ولدي و جود عليًّ
و نهار كبرت و ولّيت متين ¤ خلاصي فدار العجزة مرميّة
راني غضبانة و القلب حزين ¤ يا ولدي فين الرجلة العربيّة
مريضة يمكن باقي لي شهرين ¤ ويلا سمحت فيّ سكتة قلبيّة
و الكلّ يموت يتغطّى بالطين ¤ و يتحاكم فالمحكمة السماويّة
بالسخط تدخل أسفل سافلين ¤ برضايَ تربح الجنّة هديّة
برضايَ تلقى ربّ العالمين ¤ و تقول ربحت الفردوس بوالديَّ
يفرحوا بك الموتى المرحومين ¤ و الكلّ يبارك لْ روحك المرضيّة
و تشوف بعنيك عقاب المسخوطين ¤ أكثر بحرب هتلر العالميّة
عاقّين الوالدين ممسوخين ¤ وخّا يكونوا ريّاس بلديّة
و أولاد المسخوطين قاسحين ¤ و المسخوط كي يولد يولد بليّة
خناجر بريوس والديهم مسنونين ¤ ما فيهم حشمة ما فيهم نيّة
كنتِ الْملود ولاّ نسرين ¤ دعوة الوالدين حاجة مقضيّة
ربّي شديد يستاجب فالحين ¤ النار فالآخرة و المسخ فالدنيا
يا المسخوط وجّد نفسك لْ عزرين ¤ يا المرضي مبروك نفسك محميّة
يا أخي خذها منّي يقين ¤ دعاهم يوصل مثل البرقية
و الوالدين هما دار التكوين ¤ و تفكّر لا تكَول حاجة منسيّة
يكسروك الوالدين فحمى الصالحين ¤ و لو يعينك عفريت ولاّ جنيّة
قلْ يا رضاة الوالدين أنتِ فين ¤ جرّب أخي حضّر النيّة
وخّا تكون حاصل في كمين ¤ تنجى برضاهم و القوّة الإلهيّة
و الوالدين بأولادهم حاسّين ¤ تهلّى يا الولد يا لَبنيّة
 |
| Ahmed Azizi ¤ Berkane : 18.08.2011 أحمد عزيزي ¤ بركان © Yamal |
أحمد عزيزي ©
2 commentaires:
أشكر الشاعر اللطيف أحمد عزيزي الذي أمدّني بهذا النص الاجتماعيّ الجميل، قصد نشره على مدوّنة : زجليات الحادي و العشرين ... و في انتظار ديوانه الثاني، أتمنى له موفور الصحّة و الهناء
قصيدة مؤثرة وجيدة تنم عن جودة في النظم ونبل المعنى ،ولعلي قد عرفت الآن المنحى الفني والموضوعي الذي ينظم فيه ذ عزيزي.فهنيئا له ووفقه الله
وعيد مبارك سعيد
Enregistrer un commentaire