©Yamal
من ذكر الناس لذكر الله
ومن الأنس بالنفس للأنس بالله
من لباس الشهوة للباس التقوى
ومن المعصية للتوبة
الناس حجاب والنفس حجاب
والطريق سباب
والمقصود الله
***
- واتقوا الله ويعلمكم الله –
***
فاش يفيدك تعلم الناس لما علمت راسك
وآش يفيدك تبني للغير وتريب ساسك
خلي الناس لله
الناس راقدين ويلا ماتو عاد يفيقو
يشوفو الطين ارجع لطينو
ويعرفو فين عاشو واش كانو
***
فاش يفيدك تعلم الناس
والله ورا لكل واحد طريقو
***
ايه يا نفسي
كـلـتـلـك توحشتك ما تقتيش
ايه توحشتك انت
توحشتك آ نفسي
وبغيت ندير معاك كلسا
وكل واحد يخوي قلبو
انت تفكري، وأنا انسا
واللي غلط يعاود حسابو
***
توحشتك
توحشتك انت
توحشتك آ نفسي
***
توحشتك وخا انت حجاب وعتبة
ويلا عشت غانتوحشك طول عمري
بلا بيك ما يتفتح باب ما نتخطى عقبة
ويلا مت غايتوحشك تراب قبري
ومن عظمي تنبت شجرة
مسقي بدموع التوبة
على ما فات وجاي من ذنوب
وفكل ثمرة مكتوب
تبت من وحشك آنفسي
***
ويلا وحشك كان اكثر من وحشي
نسقيك من كاس الغيرة
على نفسك ادهشي
وتحضري وتغيبي
***
ويلا وحشك كان بحال وحشي
نسقيك من كاس الحسرة
تشربي وتزيدي تعطشي
او تعصاي والتوبي
***
ويلا وحشك كان قل من وحشي
نسقيك من كاس الحضرة
تنوحي على بعدي وقربي
وتسقي بدموعك نعشي
***
كون يا نفسي تحفظي سري
وما تكشفي عيوبي
ما تخالفي حالي
تكوني يا نفسي انت سري
ترقي لحالي
ويهزك الوجد بحالي
ويبكيك مكتوبي
***
اتوحشتك يا نفسي صحرا
نعرف مسالكها وحدي
نغرس نخلة فكل واحة
ونبني خيمة لقلبي
وكل مسافر يلقى فظلي راحة
ياكل من ثماري ويزيد يجوع
ويزيد عطشو يلا شرب مايا
و عرف مسالكي
وقعد ومشى معايا
وعرف حق الطاعة والخشوع
وعلاش تنبكي
وما يشوف فعيني دموع
***
اتوحشتك يا نفسي غيمة
وانا تربة جدبة
وتوحشتك قطرة رحمة
نزلت فحلقي ولساني
نساتني فالخلق الفاني
وسقاتني بحر المعاني
***
وتوحشتك بحر بحالي
تشربي مني وتسقيني
ما تلقاي ما على سطحي
ما تبقاي موج فعماقي
تجفي من ماك وتنشفي
وتمناي وتـفكري نهار فراقي
وتملي وتنساي وترتحي
***
اتوحشت يديك مجداف
اتوحشت حضنك سفينة
اتوحشتنا انا وانت
فارض اخرى
وفجنة خضرا
راجل وامرا
بدات بيهم الخليقة
اتوحشتك آنفسي تراب
واتوحشتك مني مخلوقة
او بكاتني الحسرة
على نفس وحدة
او هي على جوج مفروقة
***
اتوحشتك وانا فيك بعيد عليا
اتوحشتك كنقلب عليك وانت فيا
***
وهزني الحنين والشوق
وملكني الوجد
وجذبني الذوق
لثمرة من ثمرات جنانك
غرستي في عينيك
وتبسمتي ومديتي لسانك
شفت شوفت العيان
شيطان غدار
وثعبان بين غصانك
وقلت بلسان الخوف من المعاصي
يا ربي يا مالك قلبي
ثبتني واغفر ذنبي
وادركني بلطفك وعجل بخلاصي
انت تبتلي وانت تعفو
وانت النور باش نشوفو
سبحانك يا جليل
يا رب الملائكة والروح
اللي قصدك بالصدق
ما يحتاج دليل
ويلقا بابك مفتوح
***
وافتح لي الله عين البصيرة
عرفت الحق بالحق
وشفت يد هازا سبحة ومصباح
وامرا مبسمة فيدها تفاح
اوخفت
خفت منك يا نفسي
ودوختني الحيرة
***
خفت من مكرك القديم
وانت في حضني طفلة صغيرة
نعطيك وتقولي زيد
اولا منعتك تقولي مظلومة
انت عشت بلا فطيم
وانا تحملت بسبابك اللومة
***
قربت وبقيت بعيد
وخفت من دلي
وخفت من اللي عرفت
وخفت من اللي شفت
من غدرك يا نفسي
ودوختني الحيرة
***
وتوحشتك وانا فيك بعيد عليا
توحشتك كنقلب عليك وانت فيا
***
وكان مكتوبي مقدر قبل ما نكون
نفارقك يا نفسي باش نكون
ونفارقك ثاني ونلقاك
واحتى واحد فينا ما عرف لاخر شكون
***
اتوحشتك آنفسي جبل
ورحمك خلوتي
نسكنها وحدي
ما نحيا ما نموت
وما تحياي ما تموتي
مجموع ومفرق بوجدي
نحضر ونغيب بالحال
ومن وحشك نقطع الحبال
بالدنيا والخلق
ونسكن فيك
نكون ليك صورة
وتكوني لي مرايا
وكل ما توحشتك آ نفسي
نشوف وجهي فيك
وما نلقاكش يا حسرتي حدايا
***
اتوحشتك آنفسي مصباح المحبة
اتوحشتك آنفسي تفاح الرغبة
او بكاتني الحسرة
على جوج نفوس
وحدة من وحدة محرومة
بكاتني الحسرة
على نفس وحدة
او هي على جوج مقسومة
***
وتوحشتنا وانا وانت
فأرض أخرى
وفجنة خضرا
راجل وامرة
ابدات بيهم الخليقة
او شفتك يا نفسي تراب
او شفتك مني مخلوقة
***
اتوحشتك يا نفسي
ويلا شربت من كاس وحشي
ينشف حلقي ويزيد عطشي
***
اتوحشتك امي وبنتي
سماي وأرضي
ترابي وغربتي
***
توحشتك تكوني غير ساعة
غير دقيقة
توحشتك تكوني حقيقة
راضية بلا كلام
توحشت وتشهيت وتمنيت
نفيق من المنام
ونحط راسي على ركبتك
تمسدي بيديك شعري
انسميك امي
اتسميني ولدك
نسميك سقف سماي
تسميني حديقة وردك
انسميك وانسميك
بكلمة مفهومة
حجاب النور
وسر الطريقة
او مفتاح الظلمة
او عتبة الحقيقة
***
يا نفسي شكون منا ولد شكون
وشكون حضن وربى
يا نفسي بيك عرفت نفسي
وكانت الولادة عسيرة
أو الاختيار قاسي
الناس يا نفسي كاتختابر الناس
وانا يا ربي كانختابر راسي
***
يا نفسي بيك عرفت نفسي
وفيك ضيعت نفسي وبيك لقيت نفسي
وكنت يا نفسي منك خايف
وليتي مني تخافي
سرك لي بان
وسري بقى عليك خافي
ونهار تعرفي يا نفسي
الطريق اللي قطعت فيها انفاسي
نكاشفك بسري ونديرك تاج راسي
***
ارحمي نفسك يا نفسي
ما قدرت نشوف رحمك يتمزق
ارحمي نفسك يا نفسي
ما قدرت نشوف دمك يتهرق
ما قدرت نخرج منك
ونفرح بعرسي
ما قدرت نبقى فيك يا نفسي
شفتك مني مخلوقة
وبكاتني الحسرة
على نفس وحدة
وهي على جوح مفروقة
***
الحمل ثقيل والولادة عسيرة
تمنيت النهار يخرج من الليل
لقيت الحياة قصيرة
***
أعاني يا نفسي وشربي المرار
أعاني يا نفسي وقاسي
ونهار تعرفي
وتشوفي الانوار
علاش تخافي
يلا ترفع الحجاب وتكشفت الاسرار
وكفنت ودفنت غروري
وصار تراب الأقدام تاج راسي
وكمل فرحي وسروري
او فقت من نعاسي
ولقيتك مرايا بلار
وشفت فيك وتشفيت منك
وشفت فيا وخاب ظنك
وعرفت من شفت المسالك
اللي قطعت فيها انفاسي
مقام وحوال السالك
ما يهنا ولا يرتاح بحالك
***
حالك يا نفسي بحالك
أو حالو بحالو
مملوك ومالك
يحضر ويغيب عليك
ويفارقك ويلاقيك
***
يمنيك باللي تبغيه
ويمنعك منو
ويبعد وتزيدي تبغيه
وانت فيه ومنو
وما عارفا مالو
ولا بغيتيه ورضيتيه
كوني فالصبر بحالو
***
يا نفسي بيك عرفت نفسي
وليك هديت المصباح
طريق المحبة طويل
وطريق الرغبة فاني
واللي قرى حق الصحبة
كيعيش مع نفسو هاني
***
ويلا بغيتي تكوني نفسي يا نفسي
ونحمل بيك بين ضلوعي
ونوضعك، ونهدهد بيك
ونرضعك من دموعي
نزلي يا نفسي من فوق اكتافي
نقريك ونربيك
ونسهر الليل نخيط ثوب على قياسك
وندفن في التراب قماط الشهوة
ونخرجك من التراب فين دفنت لباسك
التراب يرجع للتراب
وتفيقي يا نفسي من نعاسك
***
من غفلتي خليتك بلا فطيم
ومن جوعك اكليتي راسك
وانكرتي معروفي وإحساني
او كتفتيني يا نفسي
ومن غفلتي حليت آكتافك ثاني
وزهدت فكلام الناس
لكيتك كتكلميهم بلساني
***
وتفكرت مكرك القديم
وانت فحضني طفلة صغيرة
نعطيك وتكولي زيد
اولا منعتك تكولي مظلومة
انت عشت بلا فطيم
وانا تحملت بسبابك اللومة
***
يا نفسي، سكري من كاسي
وشربي خمر المحبة
كاسك ما بقى يعنيني
وشرابك ما بقات لي فيه رغبة
بالله إيماني وفيه درت يقيني
اتعلمي يا نفسي وقراي حق الصحبة
***
شراب الرغبة يشربو التراب
وشراب المحبة يفتح البصيرة
وباش تعرفي سري يا نفسي
وانت سري وانت الحجاب
عري وجهك
وحملي وتوجعي اوولدني
يخرج نهاري من ليلك
وتشرق الأنوار
ومن ظلام رحمك يخرج دليلك
يفتح كتاب الليل
ويشد بيديك ويمشي قدامك
ويشعل ليك مصباح باش يهديك
ويطفي ظلامك
***
كون ما كانت الولادة عسيرة
ما يكون الحمل ثقيل
ما تسطع شمس المعارف
على قلب عليل
ظن راسو عارف
لقى جهلو بنفسو اكثر من علمو
***
استاقمي يا نفسي يا سباب سقمي
واتعلمي يا نفسي وقراي
خلي الناس لله
من سقمك تبراي
***
الناس ناعسين ويلا ماتو عاد يفيقو
يلا تساوى عندك مسا وصباح
ما يخلعك القبر وضيقو
مول البصيرة كيشوف في الليل
ومول البصر فالنهار خاصو مصباح
***
فاش يفيدك تعلم الناس لما علمت راسك
وآش يفيدك تبني للغير وتريب ساسك
***
كون مع الناس بحال الناس
تكون على نفسك فاني
ونهار تفارق الناس
تلقى نفسك ثاني
***
الناس حجاب والنفس حجاب
والطريق سباب والمقصود الله
***
وبنفسك فارق الناس
وبالله حاسب نفسك
فاش يفيد تعلم الناس
يلما علمت نفسك
***
قتلت كل رغبة
فعشرة الصحاب
ودفنت ألف زهرة
تحت كوام التراب
***
يا نفسي كون تبغيني
مرة صورة شوفيني
ومرة قطرة شربيني
***
اشربي يا نفسي / شربي ورواي
وذوقي يا نفسي من ثماري
وتفكري يا نفسي / اتفكري ونساي
كيفاش خرجت من ليلك
وكيفاش دخلت لنهاري
سئت لي وعصيت ولمتني ونسيتي
اطمني يا نفسي ورضاي
اش ندير بعيوب الناس وعيوبي بجواري
***
استاقمي يا نفسي يا سباب سقمي
وقراي نظمي تفهمي اسراري
انا اللي قتلت وغسلت وكفنت
وانا اللي دفنتك آنفسي
وانا اللي حملت وتوجعت وولدت
وأنا المولود منك آنفسي
***
شربي يا نفسي من شراب التقوى
اشربي يا نفسي واطفي عطشك
كنت موصوف بوصافك
وكان شرابي من كاسك
صرت انتي الموصوفة
وبقات اسراري في قلبي مخفية
وسرارك عند الناس معروفة
***
اشربي يا نفسي ويزيد عطشك
توصلي للمحبوب بجناح نفسك
ما لبستك خرقة ولا صوفة
ما سحت بيك فجبال وبراري
سبحان الله فلطافو
سبحان الخالق الباري
ناديتو فجوف الليل
عبادك يا ربي ما يخافو
ادرك عبدك الدليل
برحمتك والطافك
او خطرت فالبال إشارة
من محكم اكتابو
***
" واتقوا الله ويعلمكم الله"
***
اللي حبو الله يحبو
يعلمو وينور قلبو
واللي حب الله يذكرو
ويحمدو ويشكرو
بقلبو ولسانو
يكون الله سمعو وعينو
ويحفظو بلطفو واحسانو
***
شربي يا نفسي من شراب التقوى
شربي يا نفسي واطفي عطشك
كنت موصوف بوصافك
وكان شرابي من كاسك
صرت انت الموصوفة
سري عليك بقى خافي
واسرارك عندي معروفة
***
اهجري يا نفسي شراب الشهوة
توصلي للمحبوب بجناح نفسك
من جهلك يا نفسي بجهلك
ظنيتيني مثلك جاهل
واشحال من عالم بلا قراي
واشحال من جاهل بعلمو
***
علم الله نور ما يتهدى لغافل
ونور الله علم ما يتهدى لعاصي
***
مالك انفسي حاجبة نفسك
وانتي قيدي واخلاصي
كشفي يا نفسي على نفسك
تلقاي نفسك حجاب القلوب
ومن جهلك يا نفسي بجهلك
تركبي المعاصي والذنوب
وتبرئي نفسك قدام الناس
وما تبقايش فعيونهم متهومة
وكون تكوني صادقة يا نفسي
علاش تحجبي قلبي
وانا نتحمل اللومة
انت سباب ذنبي
وتسمي نفسك مظلومة
***
استاقمي يا نفسي يا سباب سقمي
ولا هزاتك المواجد بحالي
بالله تحركي وسكني
فالليل الحالك
اهل الله يعرفو حوالك
***
لزمي التقوى يا نفسي
وشدي باليد وعضي بالنواجد
على الكتاب والسنة
وطريق اللي صدقو
تعرفي الحق بالحق
ويهديك الله لطريقو
***
ويلا هزاتك المواجد بحالي
بالله تحركي وسكني
وفالله عرفي اهل الله
ويلا تكلمت يا نفسي بالله
قراي ليهم سلام الاسلام
وطلبي حق الصحبة
قري لكل واحد بحقو
ونوحي عند العتبة
وما تبخلي بدموعك
بالله عرفي الله
باب الله مفتوح للتوبة
وفالله عرفي الله
ويلا هزاتك المواجد بحالي
بالله تحركي وسكني
سبحي لله فسجودك وركوعك
او شربي من كاس حالي
***
اتقي الله يعلمك الله
ورقي وشفقي لحالي
***
الناس يحكمو على القوال والمظاهر
والله يحكم على الأعمال والسراير
***
لعارف بالله هديت نظمي
واخفيت اسمي على علمي
وامحيت رسمي في بحر الوجد والحال
يرتاح البال وتصفى الخواطر
***
كلمتوا بصمتي وفهمني بسكاتو
***
كلامنا لله وسكاتنا لله
والمحبة فالله والصحبة لله
وتاج راسنا ونور العين
الصادق الأمين رسول الله
وكتاب الله وسنة الرسول
مفتاح القلوب ومصباح العقول
***
اللي طلب الله يلقاه
الخلق حجاب والنفس حجاب
والطريق سباب لباب الله
***
استاقمي يا نفسي وتوبي
ويلا هزاتك المواجد بحالي
بالله تحركي وسكني
اللي عرف الله يعذرني
كلامي بالحال
ولساني ماشي مني
***
وبعين البصيرة قريت فكتاب الله
- واتقوا الله ويعلمكم الله -
حريفي جمال الدين ©
2 commentaires:
صاحب باب الطالب شاعر زجال يستحق الشكر و التقدير
مجيدو
شكرا اخي على حسن ظنك متعك الله بمحبته وصحبة الاخيار من خلقه
جمال الدين حريفي
Enregistrer un commentaire