© Yamal
الطحطاحه عند نا هي الطحطاحة
إلا جيت لبركان لا كعاد لا راحه
حتى تزور وتشوف الطحطاحه
وِلاَ ماكان زحام وغاشي ف الساحه
ما ريت بركان زمان ولا طحطاحه
سلعه منوعه ف حوانت بعنايه محفوظة
واخرى برَّا ف غبار وشمس صحصاحه
ناس فخفاخه غانيه ب لوجوه باينين
تبيع وتشري مع مساكين وعمال فلاَحه
وجوه يا لطيف نحس كحل سعدها
واخرى مبشوره باسمه عينها رباحه
وشباب منعمين وزينين لباس وقدَّه
وعاطلين مقطعين بكل عجب نفَّاحه
عروسه مبرعه موركه ف حوته ليموزين
واخرى محشوره ف كاتسون كات كحكاحه
قوم كرام بما تملك من نفس ومال سخيه
وقوم مالكه الدنيا و بخيرها مشحاحه
وناس صادقه فعل وكلمه ف صراحه
ماشي حال وحدين ب لسانها لحلاحه
وناس كبار ب صواب و اخلاق ودين
وناس مفلسين بكل فعال شين نصَّاحه
وشيوخ لْغا ها زين مثال ومعاني حكمه
واخْرين عَرفه خاويين ردَّاحه وشطَّاحه
ما ننسى بنات ناس ب لباس ساتر حشوميات
وذوك لاخرات بزينها ولباسها العاري بجَّاحه
العام وخوه ب لبلاد الله كل ما عليها يتبدل
ولا يتبدل ما يجري ب بركان و الطحطاحه
بلادي زينه مشروهه معروفه بعز وهمه
حيه وعزيزه ولو كثروا عليها النيَّاحه
عبد المالك المومني ©
1 commentaire:
الطحطاحة الشفار يدو لواحة
عبد المجيد رزوقي
Enregistrer un commentaire