! يا جمّال

© Yamal

يا جمّال ردّ جْمالك علينا * راه حْنا أولاد ناس و ف العزّ تربّينا

يا جمّال ردّ جْمالك علينا * راه حْنا أولاد ناس و ف الخيرتربّينا

عْيونا على شوفة لمليح دّاو * و انت ماشي زين لا ترمي لغبار ف عنينا

كَلوبنا ب كلمة لمحبّة دواو * و انت كَلبك حجر ... نوض اخطينا

يا جمّال ردّ جْمالك علينا

لبسنا لحرير و ارميناه * كلّمنا الحقّ و اسمعناه

شفنا الزين و ادْحيناه * عرفنا لهوى و ما بغيناه

و تجي أنت يا جمّال * و تدوّز جمالك علينا

يا جمّال ردّ جْمالك علينا

***

يا لا ل يا لا لال يا لالا لي * يا لا ل يا لا لال يا مّا يا لالّة

كَوم يا كَلبي من نومك شوف الحالة * حرّ العديان ف الدواخل دار نكالة

درنا فيهم لامان يا كَلبي مشينا طوّالة * لكَيناهم ثعبان شرّ من سمّ القتّالة

نتذكّر خيمتنا يا كَلبي كَبل الشعالة * نتذكّر كَمحنا و شعيرنا ولّى نخّالة

يا شكّة ف الكَلب يا وعدي جرحك يتلالا * ليالي لعذاب يا وعدي إمتى تتسالى

عيشونا ف لخدع يا كَلبي و حنا رجّالة * عيشونا ف الضيم يا كَلبي و كثرو الكَوالة

لكن الوعد يروف يا كَلبي تصفى ذا الحالة * يبان البرهان ف الخاين يولّي دلالة

كلام الغيوان

أعده و أشرف عليه : عمر السيد

منشورات اتحاد كتّاب المغرب

مطبعة النجاح الجديدة * الدار البيضاء

ط1 * 2003

ص : 98 *99

******

زجل : عبد الرحمن الحامولى

مصدر المعلومة : الصحيفة * ع : 3 * 01.10.1998