El qasdinne Paris ! ! ّالقاصدين باري

©Yamal

من أغاني الهجرة

¤

¤

بعدن نسيت الدنيا و خاطري تاب وحنّ

  نشوف الزهو نصرّف عليه

 تارك ما عندي ف الغرام سباب

و حاسب جرحي باري و كنت ناسيه

 وثرن جرح المحنة يكون عطّاب

 من ما جرّب الامحان ما ادرى به

 ما صبت طبيب و لا جبرت كتّاب

 الجرح الناغر واشتى يداويه

و لا تامنش الدنيا تدور تقلاب

 من ضحكت ليه ليام دارت عليه

 .... .... شطران ناقصان

¤¤

 ذوك القاصدين باري * و انتوما ما زال شبّان صغار

 راني خايف يا أولادي * إلا تتلقاوْ بهموم كبار

 بلاد الناس واعرة وصعيبة *  و انتومَ وليدات صغار

 ما تجبر لا امّك لحبيبة *  و لا خوك و لا نعّار

 ما ينفعك لا حبيبك *  و لا صاحب من أولاد الدوّار

 ما ينفعك غِ ذراعك *  وِ لا خانك راك تبقى مضرار

 أجي نوصيك يا وليدي *  و اصغَ ليَّ نعيد لك مذا صار

 ويّاك الغربة تلاقي بالزين *  و الشين و هموم كبار 

 ما تعاشرش الجوايح *  و عشرتهم ما كان فيها تعذار

 خلطتهم ما تربّح *  الجوايح ما فيهم تخيار

 من شافهم هومَ سلالة *  لمخيّر فيهم تلكَاه منهم شفّار

 إلا تغفل غير ساعة  * و لاّ تسهى راه طزطامك طار

 بلاد الغربة تلاقي بالزين *  و الشين و هموم كبار

بلاد الغربة صعيبة تعدّم *  و ترشّي و تكوي بالنار

 راني خايف يا وليدي *  إلا تتّبلى  وتضحى خمّار

 كاس الخمر ما يبرّد * نار الفرقة  غَ يزيد الدمار

 كلّما يبان الفجر *  ف قيس الربعة دّير الديبار

 إلا قافز راك تلحكَ  *  إلا مرخي راك تبقى روطار

 تركب ف الميترو و تنزل *  و تصيب الفِتان في سانازار

 تصيب الغاشي مفكَم *  و الماشينة مريّضة في لاكَار

 تنظر على يمينَ و يسر*   و يبان لك كلّ سرجم فنار

 كذا كذا من علالي *  قصور و بنيان و شحال ديار

 سيد البنيان عالي *  و على جسورو يجوزوا يمينَ و يسار

 تلقى هذي تكَول هذي *  قدّة وحدة مَ ابهاهم و اختار

 تشوف الزين لمخنطر *  اللّي في باري يسخّف الابصار

 أنت غِ بالعين تنظر *  ما عندك طاكَة وِ لا مقدار

 بالسيف اللّي غريب كيفي *  من همّ الغربة يركبو ذمّار

 بالسيف اللّي غريب كيفي *  من حركَة الامحان يضحى خمّار

 كذا كذا من غريب تودّر *  و اغبر ما ابقى لو أثار

 اعْيات مّيمتو تراعي *  و اعْيات تسقسي و ما بان اخبار

 لا مرسول لا بريّة *  و لا من يعيد ليها كي صار

 ما عرفاتو جاور المنسيّة *   و لاّ راه في هاذ الدار

 بفراق وليدها تنوّح *  و دموعها سايلة م الابصار

 كبدتها مجرّحة معطوبة *  و الكَلب شاعلة فيه النار

 ذوك القاصدين باري *  و انتوما ما زال شبّان صغار

 راني خايف يا أولادي *  إلا تتلقاوْ بهموم كبار

 شعر :  المرحوم أحمد البنهاري

feu  Ahmed Elbennhari

 غناء :  المرحوم محمّد يونسي

feu Mohammed Younsi

فرّغت هذا النصّ بالدار البيضاء يوم 23.03.2006

عن شريط من نشر يونسي فون رقم 02 بركان

 و نشرته في السنة نفسها

 على النسخة الأولى المحذوفة من مدوّنة حاسي ميلّي

جمال الخلادي