¤
¤
مَلِّي لَعْقَل احْفى و بَدَّى يخَرَّفْ
ما لكْيتْ جْواب بَِيهْ نَتصَرَّفْ
ضْلام عْلِيَ الليلْ و أنا لَطْريكي مْتَلََّفْ
رْميتْ راسي ل السْما وَ بْقيتْ مْطَرَّفْ
بانْ لي بَرارج فُوك الصفصاف
طاوي اجْناحُو و حَاضي لَطْرافْ
لُوكانْ م َشي زينْ لْوانُو مَ يَتْشافْ
وَخا مَنْقارُو طْويلْ و جْناحُو نْضافْ
كْحَلْ و بْيَضْ زينْ الطيورَة مَ يَتْعافْ
مَلِّي كُنْت نَعْرَف برارج كْريمْ أُو مَضْيافْ
يَبْغي الحَقْ و عْلى حْياتُو مَ يَتْخافْ
دارْ مْعاهْ كْلامْ مَ فيهْ خْديعَة
نْقي صافِي مَ شِينْ الطْبيعَة
كلْتْ لُو يا برراج اللِّيلْ غْوانِي
ما صَبْت طْريك ترَدْني لَخْوانيِ
و انْتَ بْعيدْ ف لَعْلى مْهَنِّي وْ هَانِي
م َشيِ مُولَى طْبايَعْ أُو زَهْوانِي
وَا شْ مَنْ خْبَرْ عْلَى اليَعْقُوبِي وْ بَاكُورَة
والقُرْطاسْ الِّلي هْجَمْ عْلَى بَرْكانْ المَغْدورَة
هُوَ احْنَى راسُو وَجَّدْ المَنْقارْ
أَنا رْخِيتْ وَذْنيِ نسَجَّلْ لَخْبارْ
لَقْلَقْ هَضْراتْ رَفْرَفْ أُو طارْ
وَ أَنا عَقْلِي تْوَدَّرْ أُو حارْ
واشْ مَنْ سَرْ يْكُونْ ليهْ سْبابْ
نَوَّضْ فيهْ حَجْلَة و ضْحى غْرابْ
صَبْ عْلِيَ ضْلمْ دْخَلْ ف حْشايَا
عَمَّرْ قَلْبي و نْسِيتْ الدنْيا و هَمْ عْشايَا
و بْقيتْ مْرابطْ جَنْب الصَّفْصافَة
بَالِي ف بَرارج و ضْلُوعِي قَفْقَاَفة
خَفْتْ يَغْضَب أُو يَهْجَرْ لَمْدِيَنة
يَنْجَى ب كْلامْ عَنْدي مَكْوي ب لَغْبينَة
فَجَّرْ الحَالْ ف رَاسْ الزَّاوْيَة
بانْ لِي بَرَّارج ب جْناحُو الضَّاوْيَة
حَاَلفْ يَوْطَى على لَجْراحْ الكَاوْيَة
مَلِّي كُنْت نَعْرَفْ برارج كْريمْ أُو مَضْيافْ
يَبْغِي الحَقْ وعْلى حْياتُو مَ يَتْخافْ
رْغَبْتُو يْقَوِّي الخَاطَرْ
و يسَمَّعْني كْلامْ شَاطَر
خرَّجْ لْسانو على المَنقار
افْتَحْ رايُو على لَخْبارْ
عَزَّى المْدينَة و الدوار
أُو كالي
اجْمَعْ الكْلامْ و رْبَط لَحْزام
عامْ عامْ
عَرْجَت الدَّنْيا و افْسَدْ لَحْكامْ
و الصَّمْت المَذْلولْ اغْري لَبْكامْ
افْطَنْ الطَّالَبْ و اغْزَلْ لَكْلامْ
راس الكادَح مَلْوي فيد الحَجامْ
اسْمَعْ لي يَا السَّامَعْ
اسْمَعْ لي يَا السَّامَعْ
انْتيا إنْسَانْ وَانَايَا طِيرْ
فُوقْ الصَّفْصَافْ والجْوَامَعْ
نَحْضِي الجْنَازَة و رَقْصْ البَنْديرْ
عِبادْ اللهْ ناسْيانِي
وَانَا عَايَشْ ما يَنْقصْني خِيرْ
نْجيبْ عْشَايَا ف المْسَى
ف الوْسادَة ما نَرْقْدْ ب شْخِير
اسْمَعْ لي يَا السَّامَعْ
هذي هضرة مصاوبة بالميزان
الحكرة فيها طْبايعْ
وسْيوفْها ماضْيَة ب العَدْيان
ف ذاكْ اليومْ آ وْليدِي
هاجْ الحَلُّوفْ ف ظْلامْ الليلْ
اطْحَنْ الفولْ و الجْنايَنْ
و احْفَر لَقْبورْة لَخْيارْ الجِّيلْ
الناسْ قْلوبْها تْوَدِّي
تَقْبَلْ القَسْمَة و تَرْضى ب قْليلْ
الطيرْ بْحالي مْبَرْدِي
عْيونو حَية عْلى طولْ الليل
برارج يا الطير الولهان
بَراراج يَا الطايَرْ
بَرارجْ يَا الطِّيرْ الوَلْهان
جَلْت البُلْدانْ هاجَرْ
لْقيتْ المَرْعَى مْوَاتيَة في بَرْكانْ
ف حْياتَكْ مَاضِي تْخاطَرْ
هَذِي بَلْدَة لْكيتْ فيِها لَمانْ
عَنْد الوَالِي بْنيِتْ عَشَّكْ
جَرْ الصَّفْصافْ غِير سَبَّة و مْكانْ
لَبْنِي عَمَّكْ ما تْعاشَرْ
وْحيدْ اُو مَكْوِي ب غُرْبَة لَوْطانْ
فيِ مَحَّنْتَكْ راكْ سَاَترْ
دْمُوعْ الغُرْبَة تْعَذَّبْ لَجْفانْ
ف لَحْصيدَة تضَلْ ناقَرْ
تَنْقَذْ العَشْبَة ب سَمْ الدِّيدانْ
ف الَّليلْ تْباتْ سَاهَرْ
تَحْضي لَمْدينَة ب قَهْر الطغْيانْ
بَرارجْ يا الحَاكِي
الله الله يَا بَرارجْ
عْلَى حَالَكْ راهْ كلْبي مَقْناطْ
كُل نْهارْ راكْ خَارَجْ
تَشْهَدْ عْلى الحُكرَة و قَهْر الزَّلاطْ
العَشْرَة عامْرَة سْوارَجْ
ب هْمومْها عايْشَة ف الصِّراطْ
قُيَّادْها ب التْعارَجْ
نْساوْ العَشْرَة و جَابو مَشْراطْ
خيرْنا ف البَّارَجْ
مْشَى ب الجَّمْلَة و جَا بَالتَّقْساطْ
البَاقِي مَعْفونْ خامَج
و الغَاديِ صَنْدوقُو بْزيِنْ التَّكْماطْ
بَرارجْ ي الحَاكِي
احْكي لِيَ ما جْرى ف الدّوَّارْ
ازْهَرْ المَحْكومْ بَاكِي
وازْهَرْ المَحْظوظْ يزهى نوار
الكادح ب ذْراعُو يْكابَرْ
ب كَثرَة هْمومو يَهْجَرْ لَمْكانْ
الْمَضْني مَكْوي و صَاَبَرْ
ف مْصيرْ اوْلادُو و رَاهُو حَيْرانْ
الضَّالَمْ طاغيِ و داصَرْ
ب عَرْق العُمَّالْ وَشْحالْ سْمانْ
الدنْيا فيِها مْعابَرْ
فيها لَمْغَطِّي و شَلاَّ عَرْيانْ
واحَدْ ماضي يْغامَرْ
بْلَفْلُوكَة لْكى ف البحَرْ طرْقانْ
ب لَغْبينَة راهْ عامَرْ
قْصَدْ الغُرْبَة يْدَّورْ لَمَانْ
بَرَّارجْ يَا الشَّاهَدْ
بَرَّارجْ يَا الشَّاهَدْ
اشْهَدْ ب غْرامِي و عَشْق المَغْلوبْ
اشْهَدْ ب حْياتِي المَرَّة
و اكْتَبْ مْحانِي فْذاكْ المَكْتوبْ
العَشْق العَذْري النَّاضِي
يْجيبْ الهَضْرَة و كَثْرَة لَقْوالْ
و العَشْق العاصِي المْخْزي
عايَشْ مْهَنِّي و كَثْرَة لَمْوالْ
كَالُو ليِ يَا الغَافَلْ
احْضيِ راسَكْ لا تنَظَّمْ لَقْوالْ
السَّاكَتْ يْنالْ ياسَرْ
الثَّايَرْ دِيمَا مَنْقوصْ الحَالْ
رْفَاقَكْ مْشاوْ رَاحُو
و انْتَيَا مَا زَالْ مَكْوي ب غْلالْ
فِيهُمْ الِّلي رْمَى سْلاحُو
احْنَى رَاسُوا كيِ الذِّيبْ المَذْلالْ
فيهُمْ اللِّي جَابْ رَاسُو
كَثَّرْ ب الدَّوْلَة وَشْحَالْ خْوَالْ
انْتَيا مَغْشِي وغَافَلْ
شْدَقْ الخُبْزَة اتْجيِبو ب احْلالْ
وَشْحالْ مَّا كُنْت فَاطَنْ
رَاسِي خَاوي و عَقْلي مَسْكونْ
لَبْدَى مَضْني و شَاطَنْ
نَهْضر وَحْدي كِيفْ المَجْنونْ
نَكْتَبْ و نْزيدْ نَقْرَى
و اكْلامِي ما يَغْوي لَجْيالْ
الكْلام المَكْوي ب جَمْرَة
ف الدَّنْيا مَا يْحَقَّق مُحالْ
فَكَّرْت فقَلْ صَبْرِي
كُلْتْ وْقِيلَة عَقْلي وهْبالْ
دْماغِي راهْ شَاطَنْ
تلَزْمو ا فَكرَة تكطَّع لَحْبالْ
اهوال الغربة
انْهارْ طْوالو هْوالي
ارْكبتْ الغرْبَة نزَيَّن لِيَّامْ
لَبْحَر عَمرو قْصيرَة
و باري عَمْرو يشَيَّبْ لَحْمامْ
ف الفْجَرْ نكون فايَق
ف العْشِيَّة ما نَبْغِي تَسْوالْ
اعْضامي غَابْنَني
مهلوكة بضنك القُضْبانْ
اطْفالي يَرْجَاو فُرْجَة
لَعْب اُو خرْجَة لْزينَة لَجْنانْ
و انايا مَرْخِي ب الَعْيا
نرْجى لوسادة تْكَمَّدْ لَمْحانْ
ف الوْسادَة تْبانْ هَضْرَة
نْديرْ مْزِيَة و نَبْني مَشْروعْ
نْعَشِّي نَبْنِي الفَكْرَة
نَنجىَ بالزَّلْط او قَهْر الجُّوعْ
لَمْرَة تَرْجَى لْكاهَا
هِيَ مَغْبونَة و تَطْلَب لَهْوَانْ
نَرْمِي راسي حْذاها
تَجْبَدْ هَمْ الدَّنيا و كَثْرَة لَعْيالْ
آ شافُوني دَرْت لُوطُو
كالو ذُو مال خَافِي لَمْوالْ
ف هَمِّي زادو يْصوطُو
طْوالْ عْذابي و اصْعابْ الحَالْ
يا مَحنْتي طاوْعِني
يا مَحنْتي طاوْعِني
و غَرْمي لي عْلى ذاكْ الجيلْ
طَلْعي ب هْمومْ كلْبي
و عَصْري بيها مَوْزونْ سْليلْ
الَغََْْرابْ اللِّي خْلى صْوابي
نْكصْ جْناحُو و يَصْبَحْ ذْليلْ
نْعيشْ أَنا مْعا حْبابي
ف حْجْر لَمِّيمَة و عَشْرَة لَخْليلْ
رَبيتْ الكبْدَة الحُرَّة
ف ذيكْ الرَّحْبَة ف ذاكْ الزيتونْ
عَشَّاتْ امْحاني ف غَرْبَة
مَطْلِيَة ب عْذابْ اكْحَلْ اللُّون
غُلْبي يانا فاضْ كلْبي
مَ لْكيتْ عْشير نْوَلي ليهْ
كلْبي ب النَّار يَكدي
و غْزالي ب الشوقْ حَالُو عينيهْ
لَمْصيرْ اللي بْغيتو
لْكاني ب الهولْ مَفتونْ الحالْ
العشيقْ اللّي رْضيتو
لكاني ب الغلْب مَخطوفْ البالْ
¤
© يوسف الطاهري
