زجليّات الحادي و العشرين: اشْتاهْ لي بَرْكانْ

19/10/2009

اشْتاهْ لي بَرْكانْ

الدار البيضا خلّيها
رشّاتْ الصدر لا تبكيها
الطريكَ غادية نيشان
آ وجدة خبّري بَرْكانْ
وْليدها جايها فرحان
كَلبي اشْتاهْ اشْتاهْ
اشْتاهْ لي بَرْكانْ
اللّتْشين والرمّان
الاصحاب و العشران
و الجّفن ذاك النعسان
راني ظمآن
كَلبي اشْتاهْ اشْتاهْ
اشْتاهْ لي فزوان
دوا ماهْ و ديفان
نعناع جراوة
نديرو كيسان
كَلبي اشْتاهْ اشْتاهْ
اشْتاهْ اشفار الوسنان
تخرج من غار النسيان
تخمد نار الولهان
فاض الغيوان مالت الاغصان
ما بقى خاطر غيضان