صورة التقطت للمرحوم في مسقط رأسه دوار تينيسان
...
قصيدة من ثمانين بيت زجل
موضوعها أحلام الهجرة الوردية و خيباتها المريرة
...
لو كان الباسبور عندي *** نمشي لفرنسا نولي لاباس
منين الباسبور والو *** ما عندي ما ندير يا بنت الناس
لو كان الباسبور عندي *** نركب ف الطايرة و نقطع لبحور
نخدم و ندير لملاين *** نشري لوطو نجيبها ف البابور
لو كان الباسبور عندي *** نقطع لفرنسا و نخدم ف النور
نترفه و نجي لوجدة *** نبني لك حمام و نزيد السور
لو كان الباسبور عندي *** نقطع لفرنسا نزيد لبلجيك
نصفط لك الدراهم *** و انت حرية شكون اينابيك
لو كان الباسبور عندي *** نديك معايا علاش نخليك
نخدم و انتيا حذايا *** ننسى همومي و نتونس بيك
قالت لي يا الراجل *** صنت ليا بغيت نسقسيك
الضفدعة واش قالت *** نهار اللي لمهم المليك
سقساها سيدنا سليمان *** و قال يا مرة واسم بيك
علاش قعدت انتيا *** و الوحوش الكل هربت عليك
قالت لو حروق بطني *** و عز أوطاني خير من بلاد الناس
الدنيا من قبيل تغدر *** هذا زاهي و ذاك قاطع لياس
لو كان الباسبور عندي *** نقطع للمان نولي ريش
نصفط لك البلايز *** حيك النيل يا مرة لا تبكيش
لو كان الباسبور عندي *** ندير الماندة و نرسل دبيش
نشري لك فيلا جديدة *** و نرقدك يا مرة غ ف الريش
لو كان الباسبور عندي *** نديك معايا و ما تقعديش
نردك كي بنات باري *** تمشي ف الزنقة و ما تنعرفيش
لو كان الباسبور عندي *** نكري كرسونة و ما تخدميش
منين الباسبور والو *** و اسمحي لي يا اختي ما عنديش
طلبت الباسبور لخضر *** قالو لي واشتى تعمل بيه
قلت لهم بيه نخطر *** نمشي للخارج و نولي بيه
سهل ربي وافقوني *** و قالو لا ديرشي كي لخرين
احرز الباسبور لخضر *** ويلا بعتو راك تندم ف الحين
ديتو و دخلت نجري *** عل لولاد كاملة فرحوا بيه
قالوا هذا سباب رزقنا *** بونا لا تفرطشي فيه
قلت لهم سامحوني *** و نا خصوني فلوس الفياج
ديت الراديو نبيعو *** و الصينية زدت حتى المقراج
و قالت لي روح تخدم *** نقعد أنا نربي لولاد
لا تنساشي لوصايا *** و احرز روحك راه يصرطك واد
لا تنطاشي اطهلى *** خطرة خطرة تفكر الوالدين
البقرة ايلا بغيتها تحلب لك *** حش لها المرتع الزين
خليت البنت ف القماطة *** و انا خليتني نوح بالعين
اسمع الا بغيت تربح *** لا تهد شاي فينا ذا الدين
مول الفران يلغى *** و مول الحانوت خصو نصيب
مول الكتان واعر *** و مصروفه كالخروف مع الذيب
رفت الباسبور لخضر *** ودعت احبابي مشيت لكار
فراق غزالي يشيب *** ما نحسبش الليل يرجع نهار
ودعت اما و زدت بويا *** و بدات الدمعة ع الخد تسيل
النعمة حارمة عليا *** نخمم النهار و نزيد الليل
قيس العشرة ركبنا *** ف الماشينة ريشوا لعلامات
رفت كفوفي لربي *** عال القدرة نوصلو سلامات
طلبت أنا رجال وجدة *** سيدي معافة و جمع السادات
مول النخلات سيدي يحيى *** و انت قطب م الحوريات
الديوانة فتشونا *** في مغنية لقاونا لاسيراس
تغذينا في تلمسان *** وقت الربعة فرقنا بلعباس
سيدي بلعباس شاهر *** الوالي سيدي اعمر ودعناه
فرقنا قتالين الكرمة *** برج تليلات يا القطب وصلناه
فرقنا السينية لوهران *** الماشينة نزلتنا و مشات
في ماريا اصبحنا *** و نصيبوها مشهرة بالرايات
جبت الباسبور لخضر *** طبعتو و سكنت جوف البابور
رواح تشوف مين قلع *** بدات الموجة تكربع كركور
البحر ايبان غير ظلمة *** توسوس عقلي و قلت تبرديت
تفكرت اما و بويا *** فراق أولادي زدت تنويت
بدات الدمعة تذري *** و الرومية قالت لي واش بغيت
قلت لها سامحيني *** يا مدام أنا اليوم تعديت
شوف النملة مين تطغى *** دير الجنحان و تفرفر بيه
تبقى رتعة للزواوش *** و جميع اللي طار يتغذى بيه
هذي معنى عليا *** في وطني يا اصحابنا كنت بخير
الرزق ايلا بغاك ربي *** يعطيك و لو كنت في قاع البير
منين وصلنا لباري *** قلت لهم كانشي وين نبات
عييت انا ما ندور *** حتى القهوة عمروها لبنات
مشيت للحماس نفطر *** قلت لهم واش هذا مذبوح
قالوا غير لمسكر *** هاذ الشي اللي قبالك مطروح
دخلت لباري نحوس *** شفت الدنيا و لاخرة ف الحياة
يحسن عونك يا المبلي *** و انا رزقي داوه الروميات
الخدمة جاتني بعيدة *** كل عشية نقارع الطوبيسات
نجبر عشايا مودر *** و كسوتي موسخة فاش نبات
نمشي للحانوت نصرف *** ندير السربيس كيما لخرين
كي توصلني النوبة *** نجبر الكارني معمر بالدين
الخدمة جاتني صعيبة *** قلت انا يا نولي جزار
الشهر اللي نقول نربح *** يبقى لي ف الحيط غير المسمار
قلت أنا ندير قهوة *** نجرب زهري بلاك نال
الربح يمشي لي كريدي *** و نزيد أنا نطب في راس المال
خمسة و تلاتين الف *** ف السيمانا نجيبها كل اثنين
اللي كذبني يجرب *** يحسن عونك يا تباع الزين
*
تفريغ شخصي عن اسطوانتي 45 لفة من نشر كازافون و تيشكا فون*
2 commentaires:
Khouya maskine, Allah irahmou.. Bravo si Yamal..! Laka minni koulla attaqdirate 3ala majhoudatika alqayyima..
لا شكر على واجب
...
و رحم الله فقيد الفن الشعبي و عميد مشيخة الشرق الذي يحتاج تراثه إلى جمع و دراسة، بعيداً عن الأفكار الضيقة و المسبقة
Enregistrer un commentaire