زجليّات الحادي و العشرين: ! يا موجْ

26/04/2008

! يا موجْ

إمتى يا موجْ غادي تردني * و ف المرسى غادي تحطني
يكفي هجرة و نار الغربة * عييت م الوحدة و م الغيبة

اشتقت لبلادي يا ربّي * اشتقت لناسها و هواها
توحّشت لحبيبي ولصاحبي * إمتى نوصل نشرب ماها

الموج يمشي يهمس للبر * حامل أحلام البحارة
و انا حلمي يبقى مقهور * مسجون ف لساني يا خسارة

صاحبت الموج و تيّارو * و رميت ف اعماقو الشكوى
بغيتو يحكي لي اسرارو * ما وجدت عندو حتّى سلوى

ألّي وحشت لو كيستنّى * و دموعو على خدّو تفرفر
و تعطى لي ما لو معنى * و راهو ف المرسى ينتظر

بغيت نعانق المدينة * و نمسح وجهي ف حيوطها
و نشمّ أنسامها الحنينة * و نغنّي لجميع سكّانها

ونطوف على كلّ البيبان * وزّع برييّات الأمل
مالية بالأشواق و الإيمان * كلّها حنين للمستقبل

مصّاب نرجع للبلاد وْكانْ * و الريح يساعد المركب
نعمل حضرة ف كلّ مكان * نرتاح م الغربة و العذاب

الراحل : حسني الوزّاني

توفي رحمه الله في أكتوبر 2007
ديوان : رياض العشاق
ص : 57
نشر : جمعية تطوان أسمير
الطبعة الأولى ـ 1996

زجليّات الحادي و العشرين