قمر الليل

عبد الله بن كريو الأغواطي

¤

أنطلوجيا صوت المكنون في الشعر الملحون

إعداد : الأستاذ توفيق ومان

منشورات المكتبة الوطنية الجزائرية 2007
ص : 35 ـ 36

***

قمر الليل خواطري تتونّس بيه * نلقى فيه أوصاف يرضاهم بالي

يا طالب عندي خليلة تشبه ليه * من مرغوبي فيه سهري يحلا لي

نبات نقسّم ف الليالي ننظر ليه * يفرق من بينا الحذار التالي

خايف لا بعض السحابات تغطّيه * إذا غاب ضياه يتغيثر حالي

يا سايل عن خاطري واش مسهّيه * مع الريم اللّي جلا قلبي جالي

يا تهواسي خاطري واش ينسّيه * وين الطب اللّي يناسب لاعلالي

ضرّ معاشر كبدي و أنا خافيه * صابر للحمّى الشديدة مذا لي

هذا المرسم كانت الخدّاعة فيه * مسبوغة الأنجال خلاّته خالي
يا ما مهبّلني جيت للمرسم شاكيه * ما جوبني ما سمع لي لسوالي

مرسم ولفي كي خلا و علاه نجيه * نتفكر ما فات يثقب مشعالي

يا مرسولي سير بجوابي و دّيه * و مكّن به الظريفة و اعني لي

هات اخبار لينا كن نبيه * و المارة اللّي بينّا ورّيها لي

سال على محبوبي قلبي سال عليه * سال عليها سال شطانة حالي

قل لها و علاه محبوبك تنسيه * غيظانة شكيت ما كيشي تسالي

مزّقتِ قلبي بشفرة هضمتيه * يوم فراقك صار لي كالهبالي

خيالك عن ظاهر العين رسمتيه * واين ما صدّيت نلقاه قبالي

قدّاش انْ مرسول لي شقيتيه * كرهوك الحسّاد بغض على جالي

نشرت ثوب المحبّة و طيتيه * واه جديد محبّتك يرجع بالي

ودعتك مفتاح قلبي ضيّعتيه * سمطتي عنّي ايّامي و اشغالي

جرّعتيني مرّ ما كنتش نشتيه * ذقت اصناف الحبّ من دون اجيالي

بعيني كنت ننطح المرسم نخطيه * يتفلت منّي الميز و يغدا لي

يتفكر قلبي زمان انْ كنّا فيه * سترونا ليّام و الوقت موالي

ياك حلفت لي يمين و وفيتيه * قلت لي تشتاق ما زال خيالي

صحّ منامك بالوفا كيما شفتيه * تفسيره ما بينّا ظاهر جالي

أنت شفتي ذا المنام أُو فسّرتيه * و علمت بالجايّة قلتها لي

يا عال العليى الباليني تبليه * و اجعل حاله ف المحبّة كي حالي

تزيلف قلب الحبيبة تكويه * و تثقب مشعاله كي مشعالي

تديره شطرين عل النص تساويه * قسمة تدّيها و قسمة تبقى لي

باش تشوف الحبّ و تلوم مواليه * تعرف قدّ اللّي صبر كيما حالي

حبّي عنّي جار ما طقتشي نخفيه * يا نوايه خاطري هذا حالي