  |
| لقطة من سهل تريفة © Yamal |
ذيك النوارَه لون الشمس الجَّمرا
خلات ﯖلبي لهشيش لموحَّش جمره
وﯖمرا تتلالا ف السما بـ حال النُقرا
ضوات على لحبيبه الناعسه خضرا
ف ليلة الربيع والندا نازل قطره قطره
جاني منها ف نْسيم كلام وسلام ف بْرَا
ردِّيت السلام بـ ﯖول منظوم ف خطْره
وَانا سهران مهموم وب دمعه حاره حرة
توحشت نوَّار الفول والجلبان ف الفدان
توحشت سبولة الزرع والـﯖمح الخضرا
لاعبَه فيه ألف عشبه وزهره وزهره
حمرا وصفرا وزرﯖـه مداديه وخضرا
وبيضه ثلج وكحله وبين وبين سمرا
والسكوم والدوم والـﯖحوان وبنعمان
وذيك الغاوياني الكاوياني الداوياني الجمره
توحشت ﯖـعادي جنب لمهبلاني زينة النظرا
العذرا عزيزة النفس الحشوميه قليلة لهدرا
خضرا تسقيني من فُم البوش ماها الخْمرا
توحشت لمَّة لعشران وقرايت القرآن
وحديث واذكار اسيادي الفُقْها والفُقْرا
وحداني غريب أنا وعاشق لاوطاني عذروني
وعليل وِلاَ زرت وتصنَّت وشفت نشفا ونبرا
عبد المالك المومني
1 commentaire:
الله! الله! فين رجعتينا. لريحة الحليب فالسطل و رغوتو و دخان الفران و خبزو. لريحة شعر الجدة و الحنه عطر منو و ضفاريها نحاس يشعلو.. رديتينا للضحكة الحرة اللي ما عليها قفاص و الجرية للقدام بلا تردد و لا خوف..
Enregistrer un commentaire