الجمرة

لقطة من سهل تريفة

© Yamal

ذيك  النوارَه  لون الشمس  الجَّمرا

خلات ﯖلبي  لهشيش لموحَّش  جمره

وﯖمرا  تتلالا  ف السما بـ حال النُقرا

ضوات على لحبيبه الناعسه خضرا

ف ليلة الربيع والندا نازل قطره قطره

جاني منها ف نْسيم كلام وسلام  ف بْرَا

ردِّيت السلام بـ ﯖول منظوم  ف خطْره

وَانا سهران مهموم  وب دمعه  حاره حرة 

توحشت نوَّار الفول والجلبان ف الفدان

توحشت سبولة الزرع والـﯖمح الخضرا

لاعبَه فيه ألف  عشبه  وزهره  وزهره

حمرا وصفرا وزرﯖـه مداديه  وخضرا 

وبيضه ثلج  وكحله وبين وبين سمرا

والسكوم والدوم والـﯖحوان وبنعمان 

وذيك الغاوياني الكاوياني الداوياني الجمره

توحشت ﯖـعادي جنب لمهبلاني زينة النظرا

العذرا عزيزة النفس الحشوميه  قليلة لهدرا

خضرا تسقيني من فُم البوش  ماها  الخْمرا

 توحشت لمَّة لعشران  وقرايت القرآن 

وحديث واذكار اسيادي  الفُقْها والفُقْرا 

وحداني غريب أنا وعاشق لاوطاني عذروني 

وعليل  وِلاَ زرت وتصنَّت وشفت  نشفا ونبرا

عبد المالك المومني

تــيـــهْ وهـْــبـــالْ

1

يا مّا يا مّا..

مَشْروحْ ﯕـَـلْبي

يا مّا..

عامَرْ بَالْوَلْف

والْحُب عْلامي

يا مّا..

وَشمَهْ وَلْفي حُر

يا مّا يا مّا..

اهْوالْ لَمْحبَّة

لاﯕـي لاﯕـي

ياهْ..

يا ربي لاﯕـي

عَزّْ رْفاﯕـي

واهْ..

يْعانـْـﯕـوا اُمّاجْها

واللي ما عْناها

او ها شُطْآنْها

يَصْغى لَحْجارْها

تَلْغى بَشْكاها..

وُخَزّْ عْنادْها

عْذابه زادها

حْزانْ جْراحْها

وبينْ جْنابْها

الـﯕــَـصْبة رْياحْها

حْنانْ دْفاها..

ومْساسْ زْوارْها

حْلا فَ حْواضْها

أنا ﯕـَــلْبي لِها

حْبابي لاّ لِها

واللي ما رادْها

يْروحْ هاوْ يروحْ..

يِروح يَشْرَبْ لَبْحَر

يا مّا يا مّا..

اهْوالْ لَمْحَبّة

مْحَبَّةْ ناسي

واهْ..

حْبابْ الـﯕــَـصْبة

لَهْبالْ.. وما يْدير..

مْحَبَّةْ الطِّير

العايَمْ والسّير

والرّْبيعْ..

والشّْجَر

ومَنْ عْشابْ الضّر

وَلْفَكْ نَعْـثـَرْ

وما تـْجَرْجَرْ

حْمامي ﯕــَـرْﯕــَـر

طارْ..

ﯕــَـــلـْـبي

غاظـْ

نَكـْسَرْ

2

يا مّا يا مّا..

البازْ وعْلاه

والعَزّْ مَ غْلاه

والذّلّ ْ مولاه

يِطيحْ فَ خْلاه

وُيَكْلَخْ فاه..

حْذاهْ وْراه

الضَّحْكْ عَرّاه

لَواهْ لَواهْ..

إلى بـانْ لَغْدَر

شْكونْ يَهْدَر

اسْمَعْ ايوا اسْمع..

يا عْديمْ الظَّل

يا عَبّادْ الذّل

ذاكْ اليومْ يِجيك

مَ رْذالَكْ يَزّيك..

إلى ما عَنْدَكْ ﯕـَــلْب

خْلاكْ لْهيهْ..

 نَكْلَب

رَيَّـﯕـْ ثَمَّة ْ وَانـْـﯕــُـر

شـﯕـّــْ لْهيهْ..

 اغْبَر

هْنا ما لَكْ مْقام

والشّوفْ فيكْ حْرام..

هْنا عَزَّةْ ليّـامْ

وعَز ناسي لكْرام

...

مالَكْ مالَكْ.. ياه

رايَكْ مْوَدَّرْ

يَزّاكْ تْقَفْقيف

راهْ رْﯕــَـبْ الصيف

وانتَ عادْ تْليف

وكْلامَكْ بَسّيف..

بَرْكا مَ التَّخْريف

ما قْريتْ ما تَجْبَر

واهْيا.. اسْمَع..

العود يَعْرَفْ مولاه

وﯕــاعْ مَنْ جاهْ هْواه

ما يْخَيَّبْ رْجاه

.............

وما فْ عينه يَكْبر

اللي منَّهْ سْخَر

3

آهْ يا بويا..

واشْ نْدير..

...

يا رْفاﯕـْ العَشْرة

بونادَمْ الـﯕـَـدْرة

لاّ سَلْعة مُرّة

...

هاوْ كْبيرْ الرّاس

لَحْلاحْ وُلَحّاس

يا ربي تَسْتَر..

 4

يا راحَةْ روحي..

او مالْ ذاكْ التّوت

ﯕَـعـْـﯕَـعْ عَلْ لَطْراف

والخَرّوبْ يِموت..

الزيتونْ.. الصَّفْصاف..

ما حْنا ما زْهَر

وجْياحَةْ لَجْياح

تْعانَقْ ف لَرْياح

جْفَلْ طيري فَرْفَر

5

زْماني يا راسي..

او يا حيرْتي فيه..

ويّاكْ آ راسي..

النخلة.. عَزّْنا لْهيه..

وشْكونْ تَمّْ سْقاها

لَحْبيبة ف الصحراء

تْعَرَّجْ فَ سْماها

تَزْهَرْ ذيكْ الحُرّة

تَعْطيكْ حَبّْ التّْمَر

وُمَنْ كْساها سْتَر

6

واهْ واهْ واه..

آهْ آ قومْ الفيش..

يا ﯕْــنايَنْ العيش..

هْنا رْفاﯕـْ الكُرّيش

وفيهْ حْمامي ﯕـَرْﯕـَـر

آهْ يا ﯕـَلْبي..

والزيتون سْقيه

كُنْ حارَسْ عْليه

لاّ يْوَلّي زَبّوج

شْبابْ أو عـْـﯕـــوز

ومَنْ بْغى يَعْطيه

بين هْنا ولْهيه

لَمْزاحْ يِناديه

واللتْشينْ يِجيه

العَزّْ زينْ النَّظْرة

وكذا مَنْ شَجْرة..

7

وانْتِ يا لالّة..

يا نْوارْ الدَّفْلة

يا السَّرّْ الْمَكْنون

هاوْ جيتَكْ بَالله

سامْحيني وَشْكون

يــِﯕـولْ انْتِ مُرّة

8

يا بْنايَنْ ما كانْش..

العيشْ إلا ﯕـْزيز

خَلّوا النَّحْلة تْزيز

تَرْعى مْ كُلّ ْ زْهَر

مْعَ نْوارْ الشَّمْس

تحْتْ ضَيْ الـﯕـَـمْرة

9

يا وْلادْ النَّدْبة

مُورْ نَكْبة نَكْبة..

ويـنْ الرَّجْلة

يَكْفى بَهْدَلة

يَكْفى مَ الـْحـُـﯕْــرة

10

آحْ.. يا لَحْبيبة

يا رْياحْ الـﯕـَصْبة

هْبوبَكْ جَدْبة

هْوالَكْ مْحَبّة

التّيهْ فيكْ مْعَزَّة

الْحَطّة لاّ بَالرَّزّة

الْداخَّلْ وُ بَرّا

آحْ.. يا لَحْنينة..

لَزّي لَزّي..

رَيّْحيني نَهْنا

ناعَوْريتَكْ نوراني

لَزّي لَزّي..

هَزّي روحي نَبْرا

ما زالْ.. ما زالْ..

أنا ولَهْبالْ..

ما زالْ.. ما زالْ..

لَهْوالْ.. لَهْوالْ..

...

كْلامي تايَهْ ليهْ..

والتّيـهْ ف زْماني ليهْ..

ميزاني طايَحْ ليهْ..

والتّيـهْ ف قْصيدي ليهْ..

لَمْساسْ.. لَمْساسْ..

...

بَرْكاني.. بَرْكاني..

...

يا رْياحْ الـﯕـَـصْبة

لَزّي لَزّي

يا لَحْنينة لَزّي..

هَزّي روحي نَبْرا

هَزّي روحي نَبْرا

...

أحمد اليعقوبي

الشاعر الزجال أحمد اليعقوبي  رفقة القاص أحمد بلكَاسم

©Yamal

ثلج ف جبالي

© Yamal

الثلج ف جبالي
هيج لي حالي
خلاني نهالي
ب وطني واصحابي ومَّالي
لاله خضرا أشاره
ل لمغرب الغالي
حره بنت الحره
والوالد مول دين وَالي
خيرو  ما يسالي
أرضو  جنه خضرا
يميني وشمالي
وسماه ف الليالي
نجومها تلالي
ب علامو  نْشالي
ونعلقو ف لعلالي
ب مجدو  نْبالي
فضلو ما ننساه
وديما ف بالي
قابلني ف كل حال
ب عقلي وهبالي
يا لايمني على ذا الحال
زور واشرب وجرَّب
و  لخبار...  تالي
نطلب ربي العالي
نبقى فيه ف سلام وأمان
ويلقا عدُوه  لَخْلا الخالي
ونحميه ب روحي ومالي

عبد المالك المومني