¤
¤
ما صاري للّبيب مول الرايعات
منّهْ جنيتْ كم عبرات
*
لمع في بالي هاذو لحظات
ما محات لغاه لسنين الخاليات
اللّي مع احبابَهْ و العشبات
راكَد ف زينة الكديات
و ما ضوات في راسَهْ شعرات
*
أ شيخي خدعوك
أ شيخي غرّوك
اصحاب لنفوس الدانيات
الكيّادين ف الظلْمات
ف صبحيّة ف الدوّار
جانا خبرك و أيّ اخبار
بكات مّيمتك من الكَرحة هبلات
لفقير باباك لبدا طالب سلامات
من وزّان جاب لنا سبحات
اقرا آيات سيّل دمعات
عليك رحّم ف السجدات
برايا ما دركو دسايس و لا لعبات
بنات و صبيان دهموهم صدمات
و لبيض غطّى الكلاّل و الكَصبات
*
أ شيخي خدعوك
أ شيخي غرّوك
الشاقور و الخدمي
بقات فيهم ريحة خزامات
*
بدم شيخي و جذوع الخرّوبات
حشّمتك آ الطريكَ الوجديّة
و بلفّة الرزّات
خبّري الخلاّدي و عشّاق الكلمات
واش ظفروا واش ارتاحوا؟
عديان الغيوان من هم في جهل و خزيات
ف التقصيرات واش بكّموا مركَومات
و لاّ سكّتوا زغراتات؟
*
أ راوي الأعشاب و كامل النبتات
مغفرة لشيخي و مول الكلمات
و من لا كادوا ف اللّيلات
¤¤
© جمال الخلاّدي
3 commentaires:
حمحم يا عودي لهلى اجريك
واشعر يا خلادي غدا انفاخر بيك
هدا شيخ ابلادي راه اسلم اعليك
غني يا شادي ها العر اعليك
امجيدو
شيخ اشيوخ اغواني
بالسبحة راه ابلاني
و بنار الحرف اكواني
اش نعمل أمحاني
امجيدو
إني أتوقع تدفق قريحتك بقصائد جميلة
...
فلا تبخل علينا بالكلام الذي يضوع و لا يضيع
...
و لك منّي جزيل الشكر
Enregistrer un commentaire