¤
ف ليله صافيه
وف طريق الساقيه
شفت خيال
ف زينو جنيه
صابني ب هبال
وتبعتو نبغي وصال
من خبالي
نسيت نعالي
ونسيت راسي
حتى لقيت نفسي
جنب عين نايمه
وقالت لي لايمه
بصح ما عرفتني؟
بحال إلى عمرك ما شفتني
أنا الناعسه العذرا
اشحال بيَ همت
وف ماي ياما عمت
يالغدار كبرت ونسيت
وانا ليك ما نسيت
قلت وانا من ذهولي ما فقت
سمحي لي ياعيني
تكفيني من ماك رشه
ونبني بجنبك عشه
ونسكن حذاك
نصبح فيك
ونعشي معاك
وذا عهدي عمري ما ننساك
حضنتني ب حنانها لخليلة
وارتاحت نفسي لعليلة
ذاك منامي الليله
وكل ليله
من نبع خضرا نابع
وطريق ساقيتها تابع
والله يبقي الستر
ويجيب من حالي يعذر
¤
عبد المالك المومني
Aucun commentaire:
Enregistrer un commentaire