يا مْعذبين صبري

يا مْعَذبين صبري نَطْلَب لَعْفو من خالَقْني

أنا كْلامي قُلْته ف جَلْد غْزال كْتَبْته

وظَّفْت فيه مْعاني وحْزان ف العالم كاوْيَني

شْرَحْت فيه قْوالي والمهْموم صْبَح بوهالي

ونَتْرَجى من العالي يْشوف من حالي

يا مْعَذبين صبري نَطْلَب لَعْفو من خالَقْني

المجدوب مَنْ بَحْره رْواني

واللغْز تْرسخ ف عْماق غْصاني

ياعُشاق المعْنى ذوقوا ما جاني

إِلْهام صوفي ما شي شيطاني

والغايَب عَلْ لَوْطن رْجَعْ بَراني

يا مْعَذْبين صبري نَطْلَب لَعْفو مَنْ خالَقْني

يَطْفي نار طوفاني ويشَد أَزْري بَ خْواني

لوكان الساعة تْجاوبْني نْخَلّي عْدويا يْعاني

ذوقْ منْ لَحْدَج اللي فْ ذاكْ الزّْمان بَكاني

يا مْعذبين صبري نَطلب لَعْفو مَنْ خالَقْني

الحسن درويش

من ديوان : الزمان المكَلوب

لوحة : عبد الحفيظ مديوني

مطبعة الجسور ¤ وجدة ¤ 2012