ولدي اللوَّل

باسـم الله طيري طْـلَـعْ راسي

يِحَـوَّمْ فَمْسـاهْ ما يْجيه فْـلاس

آوْليدي فْرَحْتْ بك طار نْعـاسي

طارت لَـرْواحْ حْلالْها لَمْسـاس

سَـتَّة نوفمبر* حَـنْـنوك نـاسي

تْـلالاو عْليك جْواهَـرْ ومـاس

يوم الجمْـعَة هْـدات نْفـاسـي

لَخْواطَر هْنات تَّخْزى الخَـنّـاس

شْرَبْـنا ذاك لَعْشـي مَ الْحاسـي

طـيري وانا مـاء صافي وﯕــّاص

عَدَّلْت يا وَلْد لَحْـلال ﯕـْـلاسي

وَسْـط نْـواوْري زينَـةْ لَـغْراس

رﯕـْصَتْ لَـﯕـْصَبْ فتحت غْراسي

زْيان ﯕـْـعـادْنا حْلى شْروب الكاس

بْنـاس العَـز ما بْقيـت نْقاسـي

غَمْـروك بْـفَرْحة فاقَتْ لَقْيـاس

مّالـين الخيـر رفْعـوا لي راسي

حاطـوك بَزْهَـر عْنايَة ووْنـاس

بَعْد ما كنت مَلْفوف ف دْساسـي

جْماعة جات وشَـرْبَـتْ لَفْقاس

رَﯕـْصَتْ يا زين القَـدَّة حْـواسي

هْـداوَكْ لْبـاس ما كيفَهْ لْبـاس

هْـداوْ ليَ صـورتي عْلى قْياسـي

مْعَ ميـداي الوَلْـف راني لَبـاس

ولَوْ ما عَنْديش سـاع دْحـاسي

ولَوْ غي دَرْويش جاو خْيار الناس

تْلاشى لَغْـبَـنْ ذْهَـبْ نْحاسي

بْكيت بَالْفَـرْحَة وذْهَـبْ الباس

يا "الـﯕـصبة والطير" بْنيتْ ساسي

بَعْد عْذاب الرّوح وشقاق الـرّاس

....

مَ السّـين لَلـزّاي يا عَز لَعْـزاز

طيري يْجـود بْذو بْيـات العَـز

عـانَقْـت بك لَفْـراح بَامْتيـاز

انْتَ حْبيـبي وَلْدي غْلى مَ الْكنـز

رْواحْ الـﯕـصْبة مين بْغاتَـكْ زاز

مْشاتْ جات مْعَيا الْ مول الـدَّرْز

خَمْـسَ لاف دّاهـا الــدرّاز

الله يخْلَـفْ طيري كْفى تَقْـفَـز

مَبْروك عْليك النور طـيري فـاز

حْبابـو ما حَشَّـمْ بِكْ تَعْـتَـز

ﯕــاع فَـرْحو بِكْ شبان وعْجـاز

مَ بْهـاكْ آزيني زينَـكْ نَـفْـرز

كان قْبَـلْ اللي ما سْمَـعـني داز

بَاللـوري ما يْشـوف ما يْمَيَّـز

كان حَـﯕـّارْ عَقْـله في لَقْـفـاز

قْرايْته مْشات غي فَ شدَﯕـْ الخبـز

كَم مْ ﯕـَـلّيلْ الرّاي هْـزا ونْشـاز

كَم من حْـﯕـودي شافَكْ وتْهَـز

زِدْ آطـيري حَـوَّم كيف البـاز

ما يْسود حْسودي ولا شي يَحْـرَز

الله يحفْظَـكْ مَ اللْسـان اللـواز

وكْذا مْ كل خنّاس وهَمْز وغَمـز

وخْريـنْ آربي قاسْـهُـمْ لَغْـزاز

كَم من طَمّاع جا عَنْدي يَبْـتَـز

لِهُمْ نْـﯕـــول طـيري ما ينْحـاز

والله فَ نْـواوْرُه ما يْدير الفَـرز

وهْدور النكدْ مـا دّيـر عْجـاز

عْـليهـا طـيري ﯕــــالّي تْـرَزَّز

لا دّيـرْ شـاي عْلى اللي نَـﯕـّـاز

ما عْليهْـش آطيري خَلّيهْ يَـدْبـز

قْـلال هاذوك وْلادْ بوطَـزْطـاز

خـيرْهُم الاّ تْـراهْ غي يْبَـنْطَـز

نـاس الْـﯕصْـبَـة نورْهُم فَـرّاز

رْموز الطِّير.. وشْكال لَمَّن تَرْمـز

النـقـد الـوﯕــّــاد دايْـرَهْ دْواز

لَعْسَل الـحُـرَّة وبَـنَّـةْ اللـوز

طْلَعْ آ مْجاهَـدْ رَصْد أو حْـﯕـاز

ولّى مْقـام آخَرْ يِجيبْ الـهـز

حْبيـبي وَلْـدي يا عَـز لَعْـزاز

لـَﯕـــْرينَة تْجود بْذو بْيات العـز

...

بَعْـدْ الـزّاي النّـون آلَخْـوان

العصفـورة طّـير بِهْ لَـﯕــْرينَـة

عْلى وْليـدي تْنـادي بَـالحَنـان

بِـهْ وفيـهْ تَـﯕـْـلَـعْ لَغْـبيـنـة

عَـز طْيـاري يْجـودْ بَـالميـزان

كي الرﯕــــادة ذيـك لـحْنينـة

المَشْـيَخة الشَّـرْﯕـيـة والغيـوان

ﯕــاعْ مّـايَـدْ بْـلادي بْنـينـة

فيه يْـرى مْحـاسَنْ أبـركـان

ﯕـاعْ جْـوايَـهْ بْـلادي زيـنـة

فيه يَـزْهى بَـنْـواوْري فَرْحـان

واللي ما نَذْكَـرْشي يَسْمَحْ لِنـا

يا لايَمْـني قْـرا نَظْمي مَـزْيـان

ويلى كنتْ فاهَمْ نُـضْ خْـطينـا

فيهْ حُـبْ وَطْـني عَـزَّةْ لَوطـان

فَـعْمـاقي طـايَـف يِنـادينـا

فيهْ يَحْكي تـاريـخْ الشجْـعـان

يزناسن لَحْـرار.. كْنـوز ثْمينـة

فيهْ طـيري ما شـاف مْ لَمْحـان

بَعْض ما خْـفى مَ هْمـوم دْفينـة

فيهْ يَبْـكي عْلى حـال الانسـان

هْنـا لْهيـهْ مَجْنـوحْ يِنـادينـا

عْلى فلسطـين وحـال العربـان

ﯕـالْ آويـح.. لـيّـاهْ دّ َنّـينـا

طـير العـز ذا شَرْﯕـــي عـلاّن

الروحـاني بْ لَـﯕـْصَبْ يَحْيينـا

هِـيْ وِيـاهْ ورْواحْ الـنـوران

والـﯕـَمْرَة قْبَلْ يَصْبَـحْ تَضْوينـا

زِدْ قـرب آ شـايَـلْ لَحْـزان

رْواحْ.. لَفْراح تْـلامَسْ يَـدّينـا

...

العُصْفـورة بَالْحاء تْزيـدْ تْبـوح

عْشِيْ لَمْسـاس رْواحْ مَشْراحـة

خَمْس طْيـار كَـلْموني بَفْـروح

بْحُبْ وحَكْمَة طْيـارْ صَـدّاحـة

كل واحَدْ رْسا الفـوﯕـْ مَجْنـوح

ومْعَ طـيري حَـوَّمْ بَـمْراحـة

عشاق الْـﯕـصْـبَة ونَقْش اللـوح

مْ لَعْـلـو نَطْقـو لي بَفْصاحـة

كان قُولْ فاتَحْ بَـصْدَرْ مَفْتـوح

رُوحْ طيري هْـزازَتْ فَتّـاحـة

رْﯕـَبْ نور الْـﯕـَمْرَة عَطْر يْفـوح

مْعَ نْوارْ الْـﯕـَـصْـبَة الفَوّاحـة

طْـلَـعْ آ طـيري حَـوَّمْ ورُوح

رْواحْ لَحْمـامْ تْجيـكْ رَواحـة

رُحْ آ طـيـري حَلَّـقْ وبُـوح

بْـسَرّ عْشي لَمْسـاسْ بَشْراحـة

مْسـاسْ لَرْواحْ تْخَـرَّجْ لَريـوح

نَنْفَضْ لَمْـرارْ تَحْـلى لَمْلاحـة

بحـر الغيـوان واسَـعْ مْـروح

نَغْطَسْ نَصْـفى روحي مَرْياحـة

يِقـارَعْ شْـراعي شَلاّ صْـروح

لامان الْـﯕـصْـبَة تْجيهْ نَحْناحـة

يْعـانَـقْ يْراعي مْـواجْ الـروح

يـجَفْ.. لالا.. روحه وَحْواحَـة

لَلْـوَﯕـّــادة يـشـالي ويِـلـوح

لَـطْـروح ذي لِهُـمْ لَـوّاحـة

تَرْبَـحْ آ طـيري بولَصْـبـوح

الصباح يِجي يـنوضو الفَلاحـة

بْحَمْـد الله نَخْـتَمْ ذو لَشْـروح

ﯕـْرينْـتي تَصْبَـحْ لي مَـرْتاحـة

أبركان، في: 6-8-14-20/11/2009

 06 Nov نونبر 2009

حفل توقيع ديوان "الـﯕـصْبة والطير.."

أحـمـد الـيـعـقـوبي ©