الصوت

هدا صوت ابلادي
يهتف وينادي
ويكول يا اولادي
حالي ما هو حال
¤
بعد ما اجفاني لخليل
صار حالي اسقيم واعليل
من كترة لغدر و تدبير الهبالى
ما انفع ابخور لحكيم
ولا اكلام الكوالى
تهمش الزعيم و غابوا الرجالا
لا تامن لا تصدق من كال
صوتوا على جيم و دال
من ا سقامها تشفى لمدينة
في داك اليوم الموعود
اغبر صالح و هود
أبدات الروينة
ضحكت و ابكات لمدينة
على مول لعجينة
و معشوق الورقة الزينة
سمعو الغاشي الوعود و اكلام الخير
و رقص ابشير مع الغيطة و البندير
¤
احصات لمدينة لصوات
ولولوا لعيالات و لبنات
و املاوا الشوارع بلغوات
كالوا سعدنا
ازمان الظلام فات
دازت لسنين و ليام
مازال لمدينة غارقة في ظلام
والناس عايشة في لوهام
حتى كالوا النسا في لخيام
هدا ازمان الزواق والنفاق
فسدت لقلوب و لدواق
واتخلطوا لحروف و لوراق
¤
لمدينة من صمتها خرجت
و بلسانها تكلمت و نطقت
¤
يا اولادي
نوصيكم وصايا
من تكمل لحكايا
تظهر البدايا
و تتكرر النهايا

¤¤

عبد المجيد الرزوقي