ربـاعـيـات كـلام الـمـعـنــى

© Zakia Margoum

1
اسْمَـعْ اسمـع يا الغافـل * كَـْحز الَّهْنـا وحَلْ الوَذْنيـن
عندك لَى تْصيـر حايـل * تتبيـريمـا تْفـوتـك سنيـن


افهـم شـويا آ لغافـل * واش الـراس ولّى يـقـطيـن
مالـك اليـوم هـابـل * بْ ذيك الدفلة مولات الزيـن


اسمـع اسمـع كن عاقـل * لا يغويكشي زْواق التلـويـن
افـرز الى بْغيـت تاكـل * حبّـة الطرونج من اللتشيـن


واش صرى يا الجـافـل * ضْحيت علكـة لأمـة الجـن
ف ذاك الغيس راك واحل * وعـر الغاشي غي فيك يهيـن


ارفع راسك ويـن مايـل * واش وجعـوك ذوك الرجليـن
عمـره ما تكون نـايـل * وانت تزحف كيف الحنْشيـن


بـهَّكَـْ وشُوف فْعايـل * قبـل ما تصبـح م الخاسريـن
اقْـرا مزيـان آ لخايـل * روحه يدري ف مولات السيـن


قـرَّب لا تكون واجـل * ف شوك السكّوم حل العينيـن
وف الهندي شوك هايـل * والمـذاق فيها شحـال بْنيـن
----
الله الله يا ناس المـعـنى * نظـمـي ذا للغـافـلـيـن
امّـا انتـمَ فْ غـنـى * عنـه، راكـو مَ العـارفيـن
2
كَولوا لي يا ناس المعنـى * كَولوا لي وشكـون يـكَـول
اللغـط قـوى علينـا * كَولوا لي واش ذا الشي معقـول
---
شي يتخبط ف شْكـال * مْصايب عيشه امَّحَّن مسكيـن
حوالـه تزيـد تـذبـال * قلـة الشي والدراهـم مْنيـن


وشي ناض صرف البـال * وطلـع ل ابـراج العليـيـن
وصـل الـمـراد ونـال * قبر اخـوتـه وهـم حييـن


زهـو الـدنيـا ميـال * لعجـب كي كان وولى فيـن
ضْعيف الإيـمان مـلاّل * وا يا عجبي وكي ينكَز ف الحين


وواحـد صْبـح خيّـال * ف رمشة وضحى يشير بصبعين
وذاك يزعطـط ويشـال * ويغـز سنيـه بحـرف السيـن


لهْـوال تزيـد تذبـال * ولاخَـرْ ما زال هاز العـكّـاز
المـاضي ورْنيـن المـال * ف وذنه وخى ادّيـر له منغـاز


وواحد ما فْهم ذا الحـال * تلكَـاه ما زال يعشق لعْمـود
راسه غي يزيـد يثـقال * شي نهار يصبح ف ركن مسرود


واللي فيه الفـز قْـفـز * وغلط نكَـز ف الـواد الحـار
طيـري يا طْيـور العـز * ف سْما بـلادي اماين لحـرار


جيـبـو لي الـكَـلال * عْليه انكَـَّـر ونلغى بنْـهـار
بالهـم وليـت كَـوال * نـاس الكَصبـة شعلـوني نـار


يا اللـي دركوا لحـوال * فـهْمـوا كَولي ف هاذ المولود
هاذ الـشـي راه محـال * اولاد بـلادي كلهـم جنـود


سْقـيوا الحوض راه يذبال * زيـدوا غرسـوا زرعوا ورود
لوطـن ديـروه ف البال * ينبت الولـف والطيـر يعـود
3
الله الله يا نـاس المعـنى * راني عْييـت انــا بالكَـول
ناس فْ حيـرة ومحنـى * وكْثير خايفيـن يصْرطهم غول


الله الله يا ناس الـعـزة * واش نـديـر لـذوك النـاس
اللي يفهم غي بغمـزة * والجاهـل زايلـة ثقيـل الـراس
----
اسْمـع خلّينا آ الجاهـل * ب خْريف زْمان حلْ الوذنيـن
عندك لى تْصيـر حايـل * تـتبيريمـا تْفـوتـك سنيـن


قـرَّب لا تكون عـازل * راسك خمَّـم كُونـك رْزيـن
نـُضْ اطْلع فين نـازل * راك طايـح ف البيـر الشيـن


راك إلى صْحَـبْت فاشل * تصبح ذليـل غارق ف الديـن
الفاشـل دايْمـا واحل * مريض ف حاله ف لكوان اينيـن
----
مْعاني لك آ الفـاهـم * وغادي نزيـد لك ف التبييـن
فـيَّـق بها الـنـايـم * قبل ما يصبح ف ظهره سكيـن
----
يا لـمسـكـر راسـه * عندك تـتْغَـرْ بَالخفـافيـش
الصغيـر يفجـر راسـه * والراس لكبير راكَـد ف الريش


خفـاش الليـل واحـد * ف كل شْكـل يقـدر يبـان
يا اللي ف لوهام شـارد * قبل ما تشرب صفـّي مزيـان
----
وطْنـي ذا عـز لوطـان * بعـدوه آ خْفـافـش الليـل
خـلُّوه يعيـش لامـان * حنـا نتفاهمـو بلا دم يسيـل
----
الله الله يا نـاس المعـنى * كَولـوا لي اصل الـداء ميـن
او كيف م بعيـد جانـا * ورْتع ف رْيـوس القاصريـن


الله الله يا نـاس الـعـزة * كَولـوا لي وشْكـون يكَـول
للذيـب عْطـاو معـزة * يحضيهـا واش ذا الشي معقول


وعوَّكَـْ شحال سرحان * وكشـر لنيـاب ف الآمـنيـن
وبالحكمة ضْوات نـوران * حْمامتنـا نجات لها عمريـن
-----
الله يا حْكيـم الـحـال * بـنـوره عليك يزيـد يجـود
تتمكـن عل المحــال * الذات تبـرى وتصْفى م الـدود
4
بـلادي يا عز لـوطـان * اولادك يا امّـا مـجنـديـن
فرسان جْميع شجـعـان * سْيـوف مْهندة كيف تْليـن


كيـف مّا كان زيـنـة * زرْعـوهـا ورد وياسْـميـن
والله نبغيك آجْنـيـنـة * امَّـا لعزيـزة وطنـي لحنيـن


بْغيت يكون فيك لامـان * سْماحـة وسْـلام للآبديـن
تْويزة جُـورة والشـان * وتْعـود تْسيـل مْيـاه العيـن


فيك بـلادي العـربـان * فيك يا امّـا اولاد المـازيـغ
بْكلتهـم فيك تـزيـان * امّـا تَتْعَـزّي وْلا حَدْ يزيـغ


بين لصْخـور ف جْبـال * أنا وانت نابْـتـيـن بـزوج
عْليك نْقـاوم لـهْـوال * ف بحر ظْلام وكَـْـليب الموج

أحمد اليعقوبي