تجويع غزة

جاعت غزه في حضن بلدنا
والجوع كافر
وبلدنا في حضن السلطان
والسلطان شاطر
يحشي أكاذيب الوهم
في عينيها محاضر
ويطبع ويجعجع ويحاصر
يكتب علي وش الرمل
بلدكم قاصر
جابت من يومها ولدين
مولود في سجن السلطان
ومولود سافر
الدم الأحمر في عروقنا
صار ألوان
أبيض وازرق ذي البق
لسه بتسألني
فين الحق؟؟
شبعنا عن غزه كلام
شبعو في غزه دق
مين فينا فجر بركان
مين منكم قلبو رق
علي باب غزه
مليون سجان
يدفنو أخر طفل
في أخر بركه
إبكي وناولني المبكي
أرقص بلدي والا ارقص دبكه
حركه وقعت مع حركه
جواسيس العالم و العركه
في بلاد من غير حراس
حراسها من غير بركه
لو شافو عيالها بتحبي
يرمو عليهم شبكه
يا كل قروش العالم
غزه موش هي السمكه
مين يقدر يحشر رجليها
ويلف عليها الفلكه
مين يقدر يسرق خطاويها
وقت الحركه
صوت كل الأحرار في العالم
افتح كل بنوك العالم
واشطب من كل القواميس
إسم الحركه
واسم الحركه
واشطب أسامينا
وأسامي كل عميل
يقفل معبر أو مينا
واصل بينا وبين أهالينا
عاشت غزه
وعاشت كل سفينه
فهمنا يا صفوت بيه
أنا زعلان من إيه
موش أول شعب يجوع
والا أخر موضوع
عايشين في سنيين الدبح
إيديكوم سكاكين
اخر طواحين القمح
سلمتوها صليببين
عشان حابين المدح
هاتيجي علينا سنيين
ويغلي علينا الملح
نحلم واحنا صاحيين
بحبة قمح
من سبعه وستين
وانا عمري سنتين
حاسس بالجرح
جرح فلسطين
إحنا البني أدميين
وانتم خيالات سلاطين
إحنا نحس الجوع
ونحس الجعانيين
وانتم دايما واكلين
يا رؤساء القمه
إن كنتم من نفس الأمه
غزه محتاجه طحين
*
أحمد خفاجي
*
المصدر مؤسسة فلسطين للثقافة