البير

البير يا البير يا غارق لحفير
نسيت أيام العشرة و الدلو
بك عشت و انت لي سقيتني
و من حقك تقتلني و تحييني
كنت ترويني و تروي أرضي بلا منة
لو ما انت ما نكون في هاد الدنيا
سواقي نشفت و طيوري هجرت
شجري ما بقى يعطي غلة
كت ما كان رطب رجع حطب
عاري عليك يا البير حاول كيفاش تدير
حفرتك في بلادي و درت مزية
ربيت عليك الكبدة علاش ماك هجرني
حتى دلوك ما بقى يتيق فيك
حلف يمين ما يرجع ليك
عوجوك و صبحت على سبة
مالك زدتني كية على كية
انت صبحت طويل و حبلي عاد قصير
نطلبك ارخف علي من لحفير يا البير
غير قرب لا تهرب
لا بد يحن الرب
انت ديما طافي عطشي
اليوم فين بغيتني نمشي
ل ناوي تغدر لا تقول لي زيد احفر
خلي ماك يطلع يا البير
يروي أرضي و نرضى بما عندي
لا تخليني نشرب ماء الغير
لا بد ينزل الخير و يعمر الخدير يا البير

*
الزجال عبد المجيد البهلول

من ديوان رد البال

ص 60-61
الطبعة الأولى
1999
مؤسسة اجليلي للطباعة و النشر
وجدة