1
سلهام بلخفيف
يجي عفة و عفيف
و السلام يالا بزز
في القلب يكنزز
و صلاة أمتي لربي
تقري تعلم و تربي
ترابي للصغير حتى يكبر
و حيث الفم يتحرر يقدر
يتكلم بلا ما يعبر
لعبار مزان
يرفع المخلوق
لصف بنو إنسان
دور لسانك
و كنزز سنانك
لهديم و الريبان
لداك الفم
اللي ما يقطع اللسان
يلا زاغ بلا ميزان
سيحت بوه
يلا ما ابتر لسانو
يلا زطم و فات عتبة حد سنانو
يقطع ليه الجدر
يلا صام الكلمة
و على بصلة فطر
2
السلام الرقيق
منو وناسة و منو رفيق
راد سيف لعدو من الطريق
فاك علينا محنة و ضيق
راخف الشدة
اللي بحركة
و فوق الحرف موركة
يلا هي ضمة يضيم
وآآآآآآو واو
و لا هي فتحة يهيم
يآآآآآآآآآه
و لا هي كسرة
تكسر مقادفو
يتعجب فيك و انت عايب
يتبرم عليك و انت خايب
شاربك عوج للبكية
و يكول يييييييييييييي ياي
ييي ياي
على حركة فوق الحرف
و شادة عليه بالسيف
السيف اللي يبزز
ماشي اللي يقطع و يبتزز
السيف اللي يكوي و يبخ
ماشي اللي يسرط و يتنفخ
آمن دار ليه شدة و فخ
و يشدو شدة لعمة في الظلمة
و هي غ شدة شدة
كيف في النور كيف في الظلمة
ظلمة ظلمة آش فرز ليها لعما
3
رها غ شدة شدة
و الشدة فوق الحرف حركة
حركة حرانة
وقتهم قرانة
حركة حريرة
حركة بلا تبزيرة
وجوه مجمرة بلا تحريرة
ياك رخيص التولبل التحميرة
التحميرة يلا تحمر لوجه
جغمة قليلة تردو للونو
يكشف يبهت يصفار
بعد تلوينت لحمار
حموريت بزز
تفسخ تبزدا و لوجه يتفرز
و تعاود السنان تكنزز
يييييييييي ياي
الله يخليها سلعة
4
الله يخليها سلعة
من عند عطار ريحو يبس
ريح احبس
ما نسف من بعد ادرس
جنية خايبة لداك الغرس
و جهو صحيح مفرنس
مخلط الحبة بالتيرس
من طين الواد مكسكس
أح عليك يا درعة
و لحليب بيه ضارعة
أح عليك يا ملوية
و الطريق مسرحة
و يقولو ملوية
أح عليك يا سبو
و أنا طالبة لعفو
شوفو شي فقيه
و عندو ليا سببوا
شوفو شوافة
بعينيها صحاح
ماشي كدابة
شافت الحق
و ما تعمات
شافت الزمان
و ناضت تحمات
صاحبة ديوان : مجنون هشومة
 |
مجنون هشومة
زجل
الزهراء الزرييق
الطبعة الأولى 2005
دار أبي رقراق للطباعة و النشر ¤ الرباط |
شكراً للشاعرة الفاضلة الزهراء الزرييق التي أذنت بنشر هذه المقاطع من قصيدة زجلية مطوّلة، من جديد إبداعها ... و مدوّنة زجليات الحادي والعشرين مفتوحة لإبداعاتها وإبداعات الزجالين و الزجالات حيثما كانوا ...
