¤
¤
تبت و تهنّيت و الخاطر ارْتاح * بعد ازواجي من لَمحاين بركاني
هوّدت عيني ع لّهوى وسمحت سْماح * و تْعالجت و بدات تخمد نيراني
كي هزّيت عيني تتصادف شْباح * شْباح من لريام سيفو نضّاني
طلق عنّي سهم خلاّني نوّا ح * كيفْ رْغبتو غابْ عنّي و هْداني
حلّق بيّ ف الهوى بغير جْناح * بعد شويّة في بحر غامق رْماني
غطّسني في بحر مياهو تملاح * أُجاج و علقوم يا كيد امْحاني
@@@
همّ اليوم صعيب و زادت لَرياح * و المركب قديم ضاعف تشطاني
و نايا مغبون راكب زوج الواح * ترميني موجة و لخرى تلكَاني
ترميني حتّى نكَول هنايا نرتاح * تفكّرني تهيم بيّ عيناني
لهاذ الهمّ ما لكَيت اكتاف صْحاح * و اللّي نبغيه ف الهمّ هْداني
سلّم فيّ بعد ما عْطب لجراح * فجّر لي بركان في وسط اكْناني
في شاو الحال شار لي كَال ارْواح * حرّك لي بعيون أُو راه غْواني
@@@
كَرّبتو و الكَلب عْماتو لفراح * يا بن عمّي كَول لي واش دّاني
بعد التوبة ردّني نملى لقداح * ولّيت لو مملوك و هو سلطاني
ما عْطف عنّي ما عْطى للقلب سْراح * ما فهم لغزي ما جاوب بمعاني
نسّاني في كلّ شي سابغ للماح * شحال شكيت لو ما شفّو كي راني
يا مولانا يا اللّي ترزق لرواح * تنجّيني من واد حامل كْلاني
@@@
خايف من بعد حبّها نرجع مْزاح * و نولّي معيور ما بين اقْراني
و يكَولوا بوعلام بعد زواجو جاح * كْسر التوبة و راه ف الحبّ يعاني
و انا إلا حبّيت حبّيت التفاح * يتمنّاه كلّ شاب اللّي بكّاني
الشعر زنجي مال ع لكتاف و طاح * و الشفر مهدّب كي سفايف مرواني
...
@@@@
الشاعر : بوعلام عبّاسي
