الكَوّال

إلى كلّ الأصدقاء الشعراء و الزجّالين

كَول يا كَوّال

و اجهر بالكَول

ازجل يا زجّال

و نوّر لَعقول
كَول بالنظم
كَول بْ لَقوافي

فاجي الهمّ

بالكَول الصافي

و ذني ذوّاقة

و حسّي رهيف

نفسي عشّاقة

و كَلبي ضعيف

كَولك حكمة

فيه اسرار

للناس رحمة

كبار و صغار

كَولك زين و موزون

ما تقدّرُه سومة

يبيّن الكنز مدفون

و معانيه مفهومة

جوهر مرصّع مكنون

به الناس مغرومة

زين فن الفنون

كالكَصبة الموشومة

تنوح بصوت حنين

بإتقان مخدومة

فريد كومار ©

© Yamal

الساحة

لو كان يرجع بيّ الزمان 

لْ ساحة سيد أحمد أبركان

ف لحلاقي نقلّب ع لّمكان

منين نشوف نسمع مزيان

نسمع حكاية من حكايات زمان

تبدا بكان يا سيدي حتّى كان

حكاية ما كتبها موليير

و لاّ صاحبُه شكسبير

حكاية ما حكاها عيسى

و لا عاودها بن عيسى

بْ وحدُه الشيخ محمّد يرويها

و مرّات الشيخ أحمد يبدع فيها

ف الحلقة يصول و يجول

ف لكلام ينظم و يكَول

ب عصاتُه يلوّح كيف الفرسان

ف يدُّه سيف و ف الارض ثعبان

نسافر معاه ف الخيال

نتيه ف صحاري و جبال

نقطعو بزوج لبحور

نقلّبو على بنت منصور

نهيمو ف الثلت الخالي

يا كَليعك لا رحيم لا والي

الطريق طويلة يا دلاّلي

يلزمها نهارات و ليالي

ف النهاية ننفض سروالي

للدّار نتمّ راجع ب حالي

نضحك فرحان و مبسوط

نخرّف و نهلوس كِ دونكيشوط

نرمي نعالتي نزيد الكبّوط
ف الطريق نقّز لحيوط

 

فريد كومار

! زمان التقصيرة

©Yamal

¤

¤

زمان كنّا نديرو التقصيرة

كنّا نفرّشو غي لحصيرة

ما كان لا سدادر لا زربيّة

بردي غي المادري و الطوبيّة

نديرو الرجال ف جيه و النسا في جيه

كَليعك و اللّي شنّكَ تعمى عينيه

¤

كَاع اللّيل و ما طال

غي الكَصبة و الكَلاّل

ها و خيّي كَول عليّ و نكَول عليك

ها و بن عمّي برّح بيَ و نبرّح بك

ما كان غير سبّس و عرّش

و اللّي ما يعرفش يحسب يتّفرش

و الركَاصة غي تنكَز هنا و لهيه

غي اللّي ما بانت لهاش فيه

لباسها غي عديسة تتلالي

غي توكَف عليك تجبدهم يا دلاّلي

تمدّهم للبرّاح

و راك للصياح

هي هاه

يبرّح بك و بكَاع الفاميليا

ما ينساشي لبراوية

و يكملّها بالشيوخ و الكَصاصبة

كانوا برّانيّين و لاّ مغاربة

هكذا كانوا وليدات الناس

حتّى البوليسي علينا عسّاس

¤¤

© Farid Koumar فريد كومار