عبد المالك المومني
ماك يا لمحبوبة لالاَّ خضرا** نبَّت مني من فيضو شجرا
جمال الدين حريفي
واه واه زيد دلي غصانك ** وعطينا من شجانك ثمرا
عبد المالك المومني
خير خضرا راك ريتو مدفّـﮔ ** عزم وزور ولو غي مَرَّه
جمال الدين حريفي
يلا نادات لا لة منكولش الا ** ولا عيط سيدي منعاودش الهضرا
تم ندير الحباب وتم ندير الصحاب ** وتم نجدب ونتحير وندير الحضرا
تم تعرف شكون المسكون وشكون المجنون ** وشكون المتيم بهوى ديك العدرا
وشكون اللي يبغيها وشكون اللي يفديها ** وشكون اللي روحو ما وشكون اللي قلبو جمرا
خضرا معنى وخضرا حكمة وخضرا كلمة ** خضرا ماهي قبة ماهي ما ولا مرا
وقلت لك مرة وميات مرة ** سعدات خضرا بيك وسعداتك بخضرا
ماكاين اللي يضاهيك فالحب الفريد ** ومكاين اللي يزايد عليك بحرف وفكرة
خضرا مولاتك وانت مولاها ** انت نهار هي شمسو وهي ليل وانت القمرا
ويلا هي كلمة تكون انت معناها ** ويلا هي واحةونخيل انت رمل وصحرا
صحرا عطشانة للما والخير ** يا ربي ترويها وتسقيها من ما خضرا
عبد المالك المومني
روحي ما وقلبي جمرا ** يا آخر عشيق ل خضرا
احذر لا يدّيك هوا هاخضرا ** ولا يجرك بعيد وادها جرَّه
هاك كتاب الحاسي للخلادي ** فتح وانظر وتمعن واقرا
"قيل هواها لا تعذبك يا عشير**من ماها -ﮔال-تحذرا
خضرا ما ليها عشير" ** نزيد أنا ليها غضبه وليها نفرا
جمال الدين حريفي
الصلاة والسلام على اللي قرا البرا ** وفهم المعنى واروى الفكرة
راه المغروم ما يخشى ما يخاف ** راه الحبيبة وفية ما تخون العشرةر
الحاسي بين يدي نقرا ونعود نقرا** الحاسي دوا يلا حطيتيه على الجرح يبرا
الما خمرة والكلمة جمرة ** والحكمة ثمرة من ثمار الغاده العذرا
القد مساوي خد ونهد ** والقصاب داوي بهوى خضرا
عبد المالك المومني
عشاق خضرا شحال هماكثره ** غرقو ف اسرار ذيك الكمرا
بوشيار واليعقوبي وشلا شباب ** تقاسوا وطاحو كاوْ ف خطرا
سر ما جعلو ربي غير ف ذيك العين ** وسحر ما اعطاه غير لـ ذيك النظرا
الله يحسن عوني وعونك وعونهم ** ويبعد علينا كل حزن وحسرا
جمال الدين حريفي
ي الله الله الله الله ** ما حلاه كلام ماحلاها هضرا
هادا عسل هادا خمر ** هادا سر من اسرار الزهرا
المنورة المصورة الزينة ** الراوية الغاوية خت القمرا
المرقرقة المشقشقةالضاوية ** المضوية الشمس الحمرا
عبد المالك المومني
ﮔول ونـﮔول شعر ما بغينا ** كلامنا زين لكن غير هدرا
إلا جينا للصـح والمعقول ** خضرا-ﮔالت بنتي الصغيره -غير حجرا
ضحكت ضحكة البسط ** وبسط لحباب ما هو حكرا
ﮔلت لها يا بنتي قرة العين ** شحال من واد ﮔـهـﮔر من حجرا
هكذا ﮔال ربي عز من ﮔال ** باش ناخذو منو درس وعبره
وشحال غابت و غضبت عليَّ خضرا ** واليوم رضات وغمرني فيضها غمره
جمال الدين حريفي
مانزيد ما نزايد عليك ** يا الحبيب يا اللبيب عاشق خضرا
مازال البنت تكبر وتعقل ** وتعرف بالصدق حق الحجرا
منها نبع ما خمر وحليب ** تولد وترضع بحال المرا
يلا نعسات ورتاحت اتساه ** ويلا فاقت وراقت تعجب ف النظرا
¤¤¤¤¤
عبد المالك المومني و جمال الدين حريفي
